দুপৰীয়া 1 বজাৰ শীৰ্ষ 10 বাতৰি

দুপৰীয়া 1 বজাৰ শীৰ্ষ 10 বাতৰি

মাজুলীৰ অফলামুখ ফেৰী ঘাটৰ পৰা যোৰহাট নিমাতীঘাট অভিমুখী ফেৰীত অঘটন ৷ ফেৰীৰ পৰা ব্ৰহ্মপুত্ৰৰ বুকুত পৰিল এগৰাকী ব্যক্তি ৷ বৰ্তমানেও লোকজনক উদ্ধাৰ কৰিব পৰা হোৱা নাই ৷

দেওবাৰৰ নিশা বঙাইগাঁৱৰ কেইবা ঠাইত চিআইডি আৰু আৰক্ষীৰ অভিযান । অসম আৰক্ষীৰ উপ-পৰিদৰ্শক নিযুক্তিৰ প্ৰশ্ন পত্ৰৰ ঠিকা লাভ কৰা বঙাইগাঁৱৰ ব‍্যৱসায়ী তথা মন্ত্ৰী ফণীভূষন চৌধুৰীৰ ঘনিষ্ঠ অক্ষয় চান্দ বৈদৰ পুত্ৰৰ শহুৰেকৰ ব‍্যৱসায়িক প্ৰতিষ্ঠান বঙাইগাঁও মায়াপুৰীৰ শ্ৰীকাৰ্ণী ষ্টোৰত চিআইডি আৰু আৰক্ষীয়েচলাই অভিযান ।

সোমবাৰে পুৱাৰ ভাগত শান্তি নিৱাস বৃদ্ধাশ্ৰমত শেষ শ্ৰদ্ধা জনোৱাৰ পিছত নলবাৰীৰ ৰাজহুৱা শ্মশানত শেষ কৃত্য সম্পন্ন কৰা হয় দুৰ্ভগীয়া বৃদ্ধা গৰাকীৰ ৷ জীৱনৰ শেষ যাত্ৰাটো বৃদ্ধা গৰাকীৰ কাষত উপস্থিত নহ'ল পৰিয়ালৰ লোক ৷

ধুবুৰীস্থিত এই প্ৰাথমিক স্বাস্থ্য সেৱাৰ পৰা সম্পূৰ্ণৰূপে বঞ্চিত হৈছে শতাধিক অঞ্চলবাসী ৷ অতি শীঘ্ৰে স্বাস্থ্য কেন্দ্ৰটো পুনৰ নিৰ্মান কৰি ৰাইজক সকলো ধৰণৰ চিকিৎসা সেৱা প্ৰদান কৰিবলৈ দাবী জনাইছে ছাত্ৰ সন্থাই ৷

হাইলাকান্দিত কংগ্ৰেছৰ দলীয় সভাত উত্তপ্ত পৰিস্থিতি । দুই ফৈদৰ সংঘাতত ৰণক্ষেত্ৰত পৰিণত সভাস্থল । অসম প্ৰদেশ কংগ্ৰেছৰ সাধাৰণ সম্পাদক তথা হাইলাকান্দি জিলা কংগ্ৰেছৰ তত্বাৱধায়ক গজেন্দ্ৰ প্ৰসাদ উপমন্যুৰ সম্মুখত কাজিয়া দুই ফৈদৰ ।

আজি দেশবাসীক অৰ্পন কৰা হ'ব সীমান্ত পথ নিৰ্মাণ সংস্থাই নিৰ্মাণ কৰা 44 খন সেতু ৷ লগতে টাৱাঙলৈ নিৰ্মাণ হ'ব লগা নেচিপু সুৰংগৰ সোমবাৰে আধাৰশিলা স্থাপন কৰিব প্ৰতিৰক্ষা মন্ত্ৰী ৰাজনাথ সিঙে ৷ ভিডিঅ' কনফাৰেন্সৰ জৰিয়তে মন্ত্ৰীগৰাকীয়ে সাতখন ৰাজ্য তথা কেন্দ্ৰীয় শাসিত অঞ্চলত সীমান্ত পথ নিৰ্মাণ সংস্থাই নিৰ্মাণ কৰি উলিওৱা 44 খন সেতু দেশক সমৰ্পন কৰিব ৷

প্ৰধানমন্ত্ৰী স্বনিয়োজন আঁচনিৰ অধীনত মুখ্যমন্ত্ৰীৰ মীনমহল আঁচনিৰ শুভাৰম্ভ ৷ সৰ্থেবাৰীত কৃষ্ণগুৰু সেৱাশ্ৰমত অসম ৰাজ্যিক মীন উন্নয়ন নিগমে আশ্ৰমৰ বহুৱাতা বিলত এক লাখ মাছ মেলি এই আঁচনিৰ শুভাৰম্ভ কৰে ৷

সমাগত বিহাৰ বিধানসভা নিৰ্বাচন ৷ বিজেপিৰ ফালৰ পৰা ষ্টাৰ কেম্পেইনাৰৰ তালিকা মুকলি ৷ বিজেপিৰ বহু কেইগৰাকী জনপ্ৰিয় নেতাক নিৰ্বাচনী প্ৰচাৰৰ দায়িত্ব অৰ্পন ৷ আগন্তুক বিহাৰ বিধানসভা নিৰ্বাচনৰ বাবে বিজেপিয়ে30 জন ষ্টাৰ কেম্পেইনাৰৰ তালিকা মুকলি কৰিছে ৷

নিশাৰ ভাগত উদ্ভৱ হ'ব পৰা যিকোনো ধৰণৰ প্ৰত্যাহ্বানৰ বাবে সাজু হৈছে ভাৰতীয় বায়ুসেনা ৷ নিশাৰ ভাগত আইএএফ বিমানসমূহ পৰিলক্ষিত হোৱাৰ লগতে বায়ুসেনাৰ বহুতো বিমানৰ গুজৰণি একে সময়তে শুনিবলৈ পোৱা গৈছে ৷ এমআই-29, চিনুক, এমআই-17 আৰু পাতল ওজনৰ বিমান ধ্ৰুৱ লেহ বিমানঘাটিত নিশাৰ ভাগত দেখিবলৈ পোৱা গৈছে ৷

কলগাছিয়া আৰক্ষী থানাৰ অন্তৰ্গত লাঙলাত হোৱা এক হত্যাকাণ্ডই সমগ্ৰ লাঙলাব্যাপী তীব্ৰ চাঞ্চল্য আৰু আতংকৰ সৃষ্টি কৰিছে । 24 ছেপ্টেম্বৰত মাটি সংক্ৰান্তীয় কামত লাঙলা গাঁৱৰ আবুল কালাম আজাদ সৰভোগলৈ বুলি ওলাই যোৱাৰ পৰাই নিৰুদ্দেশ হৈ আছিল । সুঁতিৰ পাথাৰ বেঁকী নদীত আবুল কালাম আজাদৰ মৃতদেহ উদ্ধাৰ ৷