1 বজাৰ দহটা গুৰুত্বপূৰ্ণ খবৰ

1 বজাৰ দহটা গুৰুত্বপূৰ্ণ খবৰ

বাঁহীৰ সুৰেৰে শ্ৰোতাক মন্ত্ৰমুগ্ধ কৰা প্ৰভাত শৰ্মা আৰু নাই ৷ অন্ত পৰিল এটা প্ৰভাতী সুৰৰ যুগৰ ৷ মঙলবাৰে পুৱা প্ৰায় 6 বজাত শেষ নিশ্বাস ত্যাগ কৰে বাঁহীৰ সুৰেৰে ঝংকাৰ তোলা শিল্পী গৰাকীয়ে ৷ বয়সৰ দোহাই দি শাৰীৰিক অসুস্থতাত ভুগি থকা শিল্পীগৰাকী মঙলবাৰে পুৱা মহানগৰীস্থিত অম্বিকাগিৰি নগৰৰ নিজ বাসগৃহত শেষ নিশ্বাস ত্যাগ কৰে ৷ 85 বছৰ বয়সত দেহাৱসান ঘটে শিল্পী গৰাকীৰ ৷ প্ৰয়াত শৰ্মা গায়িকা তৰালি শৰ্মাৰ পিতৃ ৷

শংকৰ-আজানৰ মিলনভূমিত পৰিণত মৰিগাঁৱৰ ঐতিহাসিক দন্দুৱা অঞ্চল ৷ দন্দুৱাৰ টিকেন ডেকাৰ পৰিচালনাত একাংশ ইছলাম ধৰ্মাৱলম্বী যুৱতীয়ে সোমবাৰে নিশা দন্দুৱা নাট্য মন্দিৰত মঞ্চস্থ কৰে ‘হৰিচন্দ্ৰ পালা’ নামৰ পৌৰাণিক ভাওনাখন ৷

অসমত বাস কৰা ৪২ লাখ আহোম জনগোষ্ঠীৰ জন সাধাৰণক আগন্তুক বিধানসভা নিৰ্বাচনত বিবেক ভোট প্ৰদান কৰি বিজেপিক পুলিয়ে-পোখালিয়ে উভালি ব্ৰহ্মপুত্ৰত পেলাই দিয়াৰ আহ্বান টাই আহোম যুৱ পৰিষদৰ কেন্দ্ৰীয় সমিতিৰ মুখপাত্ৰ নৱদ্বীপ বৰুৱাৰ ৷ আহোম জনগোষ্ঠীক জনজাতিকৰণৰ নামত আভূৱা ভাৰি নাথাকিবলৈ আহ্বান ৰাজ্য চৰকাৰক ৷

বেংকক, ছিংগাপুৰ আদি চহৰৰ আৰ্হিৰে গুৱাহাটীক সজাই-পৰাই তুলিবলৈ অতি কম দিনৰ ভিতৰতে চমক সৃষ্টি কৰি অত্যাধুনিক ফুট ব্ৰীজ স্থাপন কৰা লোক নিৰ্মাণ বিভাগৰ মন্ত্ৰী ডঃ হিমন্ত বিশ্ব শৰ্মাৰ জু-ৰোডস্থিত বাসভৱনৰ গাতে লাগি থকা অম্বিকাগিৰী নগৰৰ পথেৰে পাৰ হ’লে চকু কপালত উঠিব আপোনাৰ ।

চৰকাৰী ঘোষণাৰ পিচতো আজি পৰ্যন্ত উজনি অসমৰ অগ্ৰণী মহাবিদ্যালয় টিংখাং মহাবিদ্যালয়ে লাভ নকৰিলে বিজ্ঞান শাখাৰ অনুমোদন ৷ জানিব পৰা মতে, মহাবিদ্যালয়খনে বিজ্ঞান গৱেষণাগাৰৰ বাবে লাভ কৰা ১০ লাখ টকাৰে ক্ৰয় কৰিছিল গৱেষণাৰ সামগ্ৰী ৷ কিন্তু বিজ্ঞান শাখাৰ অনুমোদন লাভ নকৰাৰ বাবে বিজ্ঞান শিক্ষক অবিহনে এইসমূহ সামগ্ৰী এতিয়া ভালুকৰ সাঙিলৈহে পৰিণত হৈছে ৷

নিৰ্বাচনী প্ৰচাৰ চলোৱাৰ উদ্দেশ্যে সোমবাৰে অসমত উপস্থিত হয় নিখিল ভাৰত কংগ্ৰেছ কমিটিৰ সাধাৰণ সম্পাদিকা প্ৰিয়ংকা গান্ধী ৱাদ্ৰা ৷ প্ৰিয়ংকাই লখিমপুৰৰ জনসভা শেষ কৰাৰ পাছতেই গহপুৰত উপস্থিত হয় । গহপুৰত বৰপুখুৰীস্থিত শ্বহীদ কনকলতা বৰুৱা, মুকুন্দ কাকতি উদ্যানত দুয়োগৰাকী শ্বহীদৰ প্ৰতিমূৰ্তিত পুষ্পাঞ্জলী অৰ্পণ কৰে ৷ ইয়াৰ পাছতেই গহপুৰ হাইস্কুল খেলপথাৰত চাহবাগানৰ মহিলাসকলৰ লগতে আত্মসহায়ক গোটৰ মহিলাসকলক সম্বোধন কৰে প্ৰিয়ংকা গান্ধী ৱাদ্ৰাই । কংগ্ৰেছৰ সাধাৰণ সম্পাদকগৰাকীয়ে এইবাৰ অসমত কংগ্ৰেছৰ চৰকাৰ গঠন হ'ব বুলি উল্লেখ কৰে ৷

দুদিনীয়া ভ্ৰমণসূচীৰে অসমলৈ অহা কংগ্ৰেছ নেত্ৰী প্ৰিয়ংকা গান্ধী ৱাদ্ৰাই প্ৰথম দিনটোতে নিৰ্বাচনী প্ৰচাৰ চলালে লখিমপুৰ জিলাৰ বিহপুৰীয়া সমষ্টিত ৷

কংগ্ৰেছ নেতৃত্বই এই আসনত মুছলমান প্ৰাৰ্থী বা মিত্ৰজোঁটৰ এআইইউডিএফ প্ৰাৰ্থী দিলে আসনখন পুনৰ বিজেপিৰ দখলত যাব-কংগ্ৰেছ নেতৃত্বক এই সকীয়নি কাটিগড়াৰ কংগ্ৰেছ কৰ্মীসকলৰ ৷

সোমবাৰে ৰণজিৎ দাসৰ ঘৰত বৰফ নগলিল ! মঙলবাৰে দিল্লীত অগপ-বিজেপিৰ আসনকেন্দ্ৰিক বৈঠক ৷ বিজেপিৰ ৰাষ্ট্ৰীয় সভাপতি জে পি নাড্ডা সমন্বিতে দলটোৰ ৰাষ্ট্ৰীয় নেতৃত্বৰ সৈতে আসনৰ ভাগ-বটোৱাৰাৰ বিষয়টোক লৈ পুনৰ আলোচনাত মিলিত হ’ব অগপ নেতৃত্ব । ৫ মাৰ্চৰ ভিতৰত অগপ আৰু বিজেপিয়ে ঘোষণা কৰিব প্ৰথমখন প্ৰাৰ্থী তালিকা ।

ৰাজ্যৰ বজাৰত বহিৰাগত গামোচাৰ প্ৰৱেশ নিষিদ্ধ কৰাৰ লগতে থলুৱা শিপিনীসকলক উপাৰ্জনৰ পথ মুকলি কৰি দিয়াৰ বাবে কলিয়াবৰত সদৌ অসম ছাত্ৰ সন্থাই ২০১৭ চনত আৰম্ভ কৰিছিল থলুৱা গামোচা উৎপাদনৰ আঁচনি ।