1 বজাৰ দহটা গুৰুত্বপূৰ্ণ খবৰ

1 বজাৰ দহটা গুৰুত্বপূৰ্ণ খবৰ

আজি বিদ্যাৰ অধিষ্ঠাত্ৰী দেৱী সৰস্বতীৰ পূজা ৷ সৰস্বতী পূজাৰ বাবে সকলো শিক্ষানুষ্ঠান সুন্দৰকৈ সজাই-পৰাই তোলা হৈছে । সৰস্বতী দেৱীক যথা বিহিতভাৱে পূজা-অর্চনা আগবঢ়োৱা হ’ব এই বিশেষ দিনটোত ৷ স্কুল-কলেজকে ধৰি শিক্ষানুষ্ঠান আৰু শৈক্ষিক প্ৰতিষ্ঠানসমূহত সৰস্বতী পূজা উদযাপনৰ পূর্ণ প্ৰস্তুতি চলিছে ৷

শেহতীয়াকৈ প্ৰাদেশীকৃত কোকৰাঝাৰৰ শোভা ব্ৰহ্ম সংগীত আৰু চাৰু কলা মহাবিদ্যালয়ৰ প্ৰায় 23 গৰাকী কৰ্মচাৰীৰ মাজত চাকৰিৰ নিযুক্তি পত্ৰ বিতৰণ কৰে বিটিআৰৰ মুখ্য কাৰ্যবাহী প্ৰমোদ বড়োৱে ৷

সোমবাৰে নগাঁৱৰ খুটিকটীয়া ৰাস ফিল্ডত অনুষ্ঠিত হয় ভাৰতীয় জনতা দলৰ পৃষ্ঠা প্ৰমুখ সন্মিলনী ৷ এই সন্মিলনতে বিধায়ক উৎপল বৰাই কটাক্ষ কৰিলে প্ৰধান বিৰোধী দল কংগ্ৰেছক ৷ কংগ্ৰেছে বহুদিন পূৰ্বেই অসম ধ্বংস কৰাৰ পিছত এতিয়া অসম বচাও কাৰ্যসূচীৰ কোনো যুক্তি নাই বুলিও মন্তব্য কৰে বিধায়ক উৎপল বৰাই ৷

ধেমাজিৰ কুলাজান চিতলমাৰীত 22 ফেব্ৰুৱাৰীত প্ৰধানমন্ত্ৰী মোডীৰ সভা অনুষ্ঠিত হ’বলগীয়া স্থান পৰিদৰ্শন কৰে ৰাজ্য চৰকাৰৰ প্ৰভাবশালী মন্ত্ৰী হিমন্ত বিশ্ব শৰ্মাই ৷ সোমবাৰে নিশা পত্নী সহিতে সাংসদ প্ৰদান বৰুৱা, বিধায়ক প্ৰশান্ত ফুকন, ৰণোজ পেগু আৰু ভূৱন পেগু আৰু আৰক্ষীৰ শীৰ্ষ বিষয়াসকলৰ উপস্থিতিত মন্ত্ৰীগৰাকীয়ে এই স্থান পৰিদৰ্শন কৰে ৷

অসম চৰকাৰৰ লোক নিৰ্মাণ বিভাগৰ অধীনত SOPD(G) ২০১৯-২০ বৰ্ষৰ আঁচনিৰ জৰিয়তে প্ৰায় 1 কোটি 21 লাখ টকা ব্যয় সাপেক্ষে নতুনকৈ নিৰ্মাণ হ'ব ৰপথাৰ-নাওহলীয়া-বৰডুবী সংযোগী পথ ৷

ভাৰতত সচেতনতাৰ অভাৱতে পথ দুৰ্ঘটনাত মৃত্যু হয় বহুসংখ্যক লোকৰ ৷ সম্প্ৰতি চলি থকা পথ সুৰক্ষা মাহ উপলক্ষে কেন্দ্ৰীয় পথ পৰিবহণ মন্ত্ৰালয়ে দুৰ্ঘটনা ৰোধৰ উদ্দেশ্যে গ্ৰহণ কৰিছে বিভিন্ন প্ৰকাৰৰ কাৰ্যসূচী ৷ সমগ্ৰ দেশ জুৰি 18 জানুৱাৰীৰ পৰা 17 ফেব্ৰুৱাৰীলৈকে মাহজোৰা কাৰ্যসূচী গ্ৰহণ কৰিছে মন্ত্ৰালয়ে ৷

ধুবুৰী জিলাৰ গোলকগঞ্জ চিলাৰায় মহাবিদ্যালয়ক শেহতীয়া বাজেট অধিৱেশনৰ লেখানুদানত বিশ্ব মহাবীৰ চিলাৰায় বিশ্ববিদ্যালয় হিচাপে ঘোষণা কৰাত উৎফুল্লিত হৈ পৰিছে গোলকগঞ্জবাসী ৷

পিছপৰা জনজাতি উন্নয়ন আঁচনিৰ অধীনত চৰকাৰে প্ৰদান কৰা এক কোটি টকাৰ সাহায্য লাভৰ পাছত আমগুৰি উচ্চতৰ মাধ্যমিক বিদ্যালয়ৰ মহিলা আৱাসগৃহৰ আধাৰশিলা স্থাপন কৰে মন্ত্ৰী চন্দন ব্ৰহ্মই ৷

দেওবাৰে চৰাইদেউৰ সাপেখাতীত উদযাপন চাওতালীসকলৰ বাহা উৎসৱ ৷ সাপেখাতী সৎনামী সাংস্কৃতিক কেন্দ্ৰত দিনযোৰা কাৰ্যসূচীৰে এই উৎসৱ অনুষ্ঠিত কৰা হয় ৷

পৰিৱেশ সংৰক্ষণৰ সজাগতা সৃষ্টিৰ লক্ষ্যৰে চাইকেলেৰে অসম ভ্ৰমণ কৰিব নগাঁৱৰ এজন যুৱকে । সোমবাৰে নগাঁৱৰ যুৱকজনে আৰম্ভ কৰে এই যাত্ৰা । প্ৰকৃতিপ্ৰেমী সংগঠনৰ সৈতে জড়িত যুৱকজনে প্ৰদূষণ ৰোধৰ বাবে সম্ভৱ অনুযায়ী সকলোকে চাইকেল চলাবলৈ আহ্বান জনায় ৷