এ আই ইউ ডি এফৰ টিকট ল'লে সাত পুৰুষ বদনামী হ'ব:হিমন্ত

এ আই ইউ ডি এফক তীব্ৰ সমালোচনা মন্ত্ৰী হিমন্ত বিশ্ব শৰ্মাৰ ৷ ভাল মানুহে এ আই ইউ ডি এফৰ লগ নলয় বুলি মত প্ৰকাশ মন্ত্ৰীগৰাকীৰ ৷

নিউজ ডেস্ক, 3 মাৰ্চ: "আত্মসন্মান থকা মানুহে এ আই ইউ ডি এফৰ সৈতে হাত নিমিলায়" ৷ সাংবাদিকে শোধা এটা প্ৰশ্নৰ উত্তৰত এইদৰে মত ব্যক্ত কৰে নেডাৰ আহ্বায়ক তথা অসমৰ প্ৰভাৱশালী মন্ত্ৰী হিমন্ত বিশ্ব শৰ্মাই ৷ ৰাজ্যসভা নিৰ্বাচনৰ বাবে কংগ্ৰেছ-এ আই ইউ ডি এফৰ মিত্ৰতা সন্দৰ্ভত মন্ত্ৰীগৰাকীয়ে এক প্ৰকাৰ পৰোক্ষভাৱে ক্ষূৰধাৰ সমালোচনা কৰে এ আই ইউ ডি এফ দলক ৷ হিমন্ত বিশ্ব শৰ্মাই কয় যে, যি সকল ব্যক্তিৰ কোনো আত্মসন্মান নাই তেওঁলোকেই এ আই ইউ ডি এফৰ পৰা টিকট লৈ ৰাজ্যসভালৈ যাব৷ যাৰ আত্মসন্মান আছে তেওঁলোকে এ আই ইউ ডি এফৰ টিকট বিচাৰি নাযায় ৷ ইয়াৰ লগতে মন্ত্ৰী শৰ্মাই কয় যে,যিসকল ব্যক্তিৰ নাম চৰ্চিত হৈ আছে,তেওঁলোকে যদি আজমলৰ পৰা টিকট লয়,তেন্তে সাতপুৰুষলৈ বদনামৰ ভাগী হ'ব লাগিব ৷ জাতিক ভালপোৱা কোনো বিবেকৱান ব্যক্তিয়ে এ আই ইউ ডি এফৰ পৰা টিকট লোৱাৰ কথা নাভাৱে ৷ বিজেপিয়ে যিহেতু তৃতীয় চিটৰ কথা চিন্তা নকৰে গতি কংগ্ৰেছে নিজা প্ৰাৰ্থী প্ৰক্ষেপ কৰিব লাগে বুলিও কয় মন্ত্ৰীগৰাকীয়ে ৷

লগতে চাওকঃঅস্বিত্বৰ সংকটত ঐতিহাসিক ডাঃ জন বেৰি হোৱাইট মেডিকেল স্কুল