গুৱাহাটী,17 ফেব্ৰুৱাৰীঃ মাত্ৰ চাৰিজন ছাত্ৰ আৰু 800 টকাৰ মূলধনেৰে আৰম্ভ কৰা এখন বিদ্যালয় ৷ এই বিদ্যালয়খনৰ আঁৰত আছে এজন বিশেষ ব্যক্তি ৷ গোহালিঘৰক বিদ্যামন্দিৰলৈ পৰিণত কৰাৰ আঁৰৰ ব্যক্তিজন হৈছে উত্তম টেৰণ ৷ গঁড়চুকৰ পৰা মাত্ৰ 7 কিলোমিটাৰ গ'লেই পোৱা যায় পাৰিজাত একাডেমী ৷ মহানগৰী গুৱাহাটীৰ কাষৰীয়া কাৰ্বি জনগোষ্ঠীৰ বসতিপূৰ্ণ গাঁও পামহিৰ উত্তম টেৰণ নামৰ লোকজনৰ প্ৰচেষ্টাত চন ২০০৩ চনত এটা গোহালীৰ পৰা আৰম্ভ হৈছিল আজিৰ পাৰিজাত একাডেমী নামৰ শিক্ষানুষ্ঠানখন ৷ বিগত ১৭ বছৰে অসাধাৰণ কৰ্মৰ জৰিয়তে উজলি আছে সমগ্ৰ দেশতে।
মহানগৰী গুৱাহাটীৰ কাষৰীয়া কাৰ্বি জনগোষ্ঠীৰ বসতিপূৰ্ণ গাঁও পামহিৰ লগতে গড়ভঙাৰ কেইবাখনো গাঁৱৰ আৰ্থিক ভাৱে দুৰ্বল ছাত্ৰ-ছাত্ৰী সকলৰ বাবে আশীৰ্বাদস্বৰূপ পাৰিজাত একাডেমী ৷ ২০০৩ চনত কলেজীয়া শিক্ষা সমাপ্ত কৰিয়ে নিজৰ গাঁওখনৰ বাবে কিবা এটা কৰাৰ চিন্তাৰে উত্তম টেৰণ নামৰ ব্যক্তিজনে নিজৰ গোহালি ঘৰটো চাফা-চিকুণ কৰি গাঁৱৰ চাৰিজন দুখীয়া কিশোৰক লৈ আৰম্ভ কৰিছিল বিদ্যালয়খন ৷ ৮০০ টকা জমা পুঁজিৰে গোহালিত আৰম্ভ কৰা উত্তমৰ শিক্ষাৰ এই যাত্ৰাই বিদেশ চুইছে ৷
চালুকীয়া অৱস্থাৰে আৰম্ভ কৰা পাৰিজাত একাডেমীৰ ১৭ বছৰীয়া যাত্ৰা কালত বিদ্যালয়খনৰ গৰিষ্ঠ সংখ্যক ছাত্ৰ-ছাত্ৰীয়ে হাইস্কুল শিক্ষান্ত পৰীক্ষাত সফলতাৰে উত্তীৰ্ণ হৈ উচ্চ শিক্ষা লাভ কৰি উজ্বল জীৱন গঢ়িবলৈ সক্ষম হৈছে। আপুনি জানি আচৰিত হ'ব সম্পূৰ্ণ বিনামূলীয়াকৈ শিক্ষা প্ৰদান কৰা হয় পাৰজিতা একাডেমীত ৷ আৰ্থিকভাৱে অনগ্ৰসৰ অঞ্চলৰ বহু শিশুক এই বিদ্যালয়খনত ৰাখি শিক্ষাদান কৰা হয় ৷ ছাত্ৰ ছাত্ৰীসকলৰ বাবে আছে এটা বিনামূলীয়া আৱাসো ৷ কিন্তু বিদ্যালয়খনৰ খৰচ ক'ৰ পৰা আহে ? দেশ বিদেশৰ বহু লোকে উত্তম টেৰণৰ এই প্ৰচেষ্টাক সহায়ৰ হাত আগবঢ়াই আহিছে ৷ বিদ্যালয় খনৰ ছাত্ৰী ছাত্ৰীৰ প্ৰয়োজনীয় সাম্গ্ৰীৰ পৰা আৰম্ভ কৰি শিক্ষক শিক্ষয়ত্ৰীসকলৰ দৰমহা প্ৰদান কৰা হয় দেশ বিদেশৰ পৰা অহা বৰঙণিৰে ৷ কেৱল ইমানেই নহয় বিদ্যালয়খনত দিয়া মানুহ হোৱাৰ প্ৰায়োগিক শিক্ষাও ৷