গুৱাহাটী, ১২ অক্টোবৰ:বিহাৰত দুৰ্ঘটনাগ্ৰস্ত হোৱা দিল্লীৰ পৰা অসম অভিমুখী নৰ্থ ইষ্ট এক্সপ্ৰেছৰ যাত্ৰীসকলক বৃহস্পতিবাৰে পুৱা ৰে’ল বিভাগে এখন বিশেষ ৰে’লৰে অনাৰ ব্যৱস্থা কৰা হৈছে । এই কথা জনাইছে উত্তৰ-পূৱ সীমান্ত ৰে’লৱেৰ জনসম্পৰ্কৰক্ষী বিষয়াই । বৃহস্পতিবাৰে পুৱা প্ৰায় ৬ বজাত দানাপুৰৰ পৰা এই বিশেষ ৰে’লখনে দুৰ্ঘটনাগ্ৰস্ত নৰ্থ ইষ্ট এক্সপ্ৰেছৰ যাত্ৰীসকলক গুৱাহাটীলৈ আনি আছে ।
উত্তৰ-পূৱ সীমান্ত ৰে’লৱেৰ জনসম্পৰ্কৰক্ষী বিষয়াই জনোৱা মতে, বিশেষ ৰে’লখনত ১০০৬ গৰাকী যাত্ৰী আছে । মাজনিশা প্ৰায় ১ বজাত ৰে’লখনে কামাখ্যা ৰে’ল ষ্টেচন আহি পোৱাৰ কথা সদৰী কৰিছে জনসম্পৰ্কৰক্ষী বিষয়াই । জনসম্পৰ্কৰক্ষী বিষয়াই জনোৱা মতে দুৰ্ঘটনাটোত চাৰিগৰাকী যাত্ৰী নিহত হৈছে আৰু ৪২ গৰাকী আহত হৈছে । ইয়াৰে তিনিগৰাকীৰ অৱস্থা সংকটজনক ।
ৰে’ল বিভাগৰ শেহতীয়া তথ্য মতে নিহত তিনিগৰাকী হ'ল ক্ৰমে কিষাণগঞ্জৰ আবু জাহিদ(২৭), অসমৰ ঊষা ভাণ্ডাৰী (৩৩), আকৃতি ভাণ্ডাৰী (৮) আৰু আন এজন নৰেন্দ্ৰ বুলি জানিব পৰা হৈছে । ইয়াৰে ঊষা ভাণ্ডাৰী (৩৩) আৰু আকৃতি ভাণ্ডৰী মাতৃ-কন্যা । ইপিনে পাটনা এইমছত ভৰ্তি হৈ থকা গভা যাদৱ(২৪), পাটনাৰ ছাদপুৰ হাস্পতালত ভৰ্তি হৈ থকা পশ্চিমবংগৰ ছালমান আলী(২৮) আৰু মণিপুৰৰ শ্ৰীভিৰহাম সিং(৩৫)ৰ অৱস্থা সংকটজনক ।