মহানগৰীৰ চচলত প্ৰাথমিক টেট উত্তীৰ্ণ প্ৰাৰ্থীৰ প্ৰতিবাদ

সদ্য প্ৰকাশিত শিক্ষক নিযুক্তি তালিকাত নাম নথকা বাবে ২০১৯ বৰ্ষত টেট উত্তীৰ্ণ সকলে দুদিনীয়াকৈ পালন কৰিছে ধৰ্মঘট কাৰ্যসূচী ৷ গুৱাহাটী মহানগৰীৰ চচলত ৰূপায়ন কৰিছে এই প্ৰতিবাদী কাৰ্যসূচী ৷

গুৱাহাটী, 3 ফেব্ৰুৱাৰী : গুৱাহাটী মহানগৰীৰ চচলত বুধবাৰে এক প্ৰতিবাদী কাৰ্যসূচী গ্ৰহণ কৰে প্ৰাথমিক টেট উত্তীৰ্ণ শতাধিক শিক্ষক পদৰ প্ৰাৰ্থীয়ে ৷ প্ৰতিবাদকাৰীয়ে জানিবলৈ দিয়া অনুসৰি সদ্য প্ৰকাশিত শিক্ষক নিযুক্তি তালিকাত নাম নথকা বাবে ২০১৯ বৰ্ষত টেট উত্তীৰ্ণ সকলে দুদিনীয়াকৈ পালন কৰিছে ধৰ্মঘট কাৰ্যসূচী ৷

বুধবাৰৰ ১১ বজাৰ পৰা বৃহস্পতিবাৰ বিয়লি ৩ বজালৈ এই ধৰ্মঘট কাৰ্যসূচী চলিব বুলি সাংবাদিকক জানিবলৈ দিছে প্ৰতিবাদকাৰীয়ে । টেটত উত্তীৰ্ণ সকলৰ অভিযোগ অনুসৰি ৫ ফেব্ৰুৱাৰীত যিসকল লোকক শিক্ষক পদত নিযুক্তি দিবলৈ গৈ আছে সেয়া কেতিয়াও বৃহৎ নিযুক্তি হ'ব নোৱাৰে ।

কিয়নো মাধ্যমিক খণ্ডৰ (DSE) চূড়ান্ত মেধাৰ তালিকাত যি সকল প্ৰাৰ্থী বাচনি হৈছে তাৰ বহু সংখ্যকে প্ৰাথমিক নিয়মীয়া খণ্ড (DEE)ৰ পদৰ মেধাৰ তালিকাতো বাছনি হৈছে ৷ তাৰ পিছত সেইকেইজন প্ৰাৰ্থীয়ে দুয়োটা খণ্ডত বাচনি হোৱাত বহু সংখ্যক টেট উত্তীৰ্ণ যুৱক-যুৱতী বঞ্চিত হ'ব বুলি অভিযোগ উত্থাপন কৰে টেট উত্তীৰ্ণ প্ৰাৰ্থীসকলে । গতিকে শিক্ষা বিভাগে এই সমূহ বিসংগতি দূৰ কৰি নিযুক্তি দিবলৈ দাবী জনাইছে টেট উত্তীৰ্ণ প্ৰাৰ্থীসকলে ৷

লগতে পঢ়ক: প্ৰমোদ বড়োৰ বিটিচিত উদ্ধাৰ অবৈধ অস্ত্ৰৰ বৃহৎ ভাণ্ডাৰ