গুৱাহাটী, ১৬ ডিচেম্বৰ :এগৰাকী ছাত্ৰ বা ছাত্ৰীয়ে যেতিয়া বিজ্ঞান শাখা নিৰ্বাচন কৰে, তেতিয়া সাধাৰণতে দেখা যায় যে তেওঁ ভৱিষ্যতে চিকিৎসা বিজ্ঞান বা অভিযন্ত্ৰিক বিষয়তহে অধ্যয়ন কৰিব । বিজ্ঞান শাখাত বা বিজ্ঞান বিষয়ত অধ্যয়ন কৰা মানেই কিন্তু চিকিৎসা বিজ্ঞান বা অভিযন্ত্ৰিক বিষয়ত নহয় ৷ অথবা চিকিৎসা বিজ্ঞান মানেই অকল এম বি বি এছ পাঠ্যক্ৰম নহয় ।
তাৰ বাহিৰেও আয়ুৰ্বেদিক, বি ডি এছ, হোমিওপেথিক, ফাৰ্মাচিষ্ট, ডিগ্ৰী-ডিপ্লমা, নাৰ্চিং, এন এন এম, জি এন এম, ফিজিও'থেৰেপিৰ পৰা আৰম্ভ কৰি লেবৰেটৰী টেকনেচিয়ানকে আৰম্ভ কৰি বিভিন্ন ধৰণৰ পেৰামেডিকেল পাঠ্যক্ৰমকে ধৰি প্ৰত্যক্ষ বা পৰোক্ষভাৱে জড়িত হাস্পতাল মেনেজমেণ্ট, মেডিকেল ৰিপ্ৰেজেন্টেতিভ আদিকে ধৰি চিকিৎসা বিজ্ঞানৰ লগত জড়িত পাঠ্যক্ৰম অধ্যয়ন কৰিব পাৰে ।
এম বি বি এছ, বি ডি এছ, আয়ুৰ্বেদিক, হোমিওপেথিকত নামভৰ্তিৰ কাৰণে সৰ্বভাৰতীয় পৰ্যায়ৰ পৰীক্ষা নীট অনুষ্ঠিত হয় । এই পৰীক্ষাত একাদশ আৰু দ্বাদশ শ্ৰেণীৰ পদাৰ্শ বিজ্ঞান, ৰাসায়ন বিজ্ঞান আৰু জীৱ বিজ্ঞানৰ ওপৰত ভিত্তি কৰি হয় । এই পৰীক্ষা সৰ্বভাৰতীয় পৰ্যায়ত অনুষ্ঠান হয় যদিও মেৰীট লিষ্টৰ ৮৫% অসমৰ ছাত্ৰ-ছাত্ৰীৰ ওপৰত নিৰ্ভৰ কৰি প্ৰস্তুত কৰা হয় । ১৫ % ৰেংকিং অসমৰ বাহিৰৰ পৰা আহে ।