গুৱাহাটী, 13 ছেপ্টেম্বৰ:পৰীক্ষা পদ্ধতিত নতুনত্ব আনিছেছেবাই ।আগন্তুক হাইস্কুল শিক্ষান্ত পৰীক্ষাৰ বাবে বিশেষ নতুনত্ব আনিছে অসম মাধ্যমিক শিক্ষা পৰিষদ চমুকৈ ছেবাই । 2024 বৰ্ষৰ ফেব্ৰুৱাৰী মাহৰ প্ৰথম সপ্তাহৰ পৰা হ'ব হাইস্কুল শিক্ষান্ত পৰীক্ষা । এই সন্দৰ্ভত ছেবাই সকলো বিদ্যালয় পৰিদৰ্শকলৈ জাৰি কৰিছে জাননী ।
আগন্তুক হাইস্কুল শিক্ষান্ত পৰীক্ষা 50% নম্বৰৰ অ' এম আৰ শ্বীটৰ জৰিয়তে হ'ব । পৃথক উত্তৰ বহীত হ'ব বাকী 50% নম্বৰৰ পৰীক্ষা । 2024 বৰ্ষৰ হাইস্কুল শিক্ষান্ত পৰীক্ষাৰ বাবে ছেবাই গ্ৰহণ কৰা নতুন সিদ্ধান্ত সন্দৰ্ভত মঙলবাৰে ছেবাৰ অধ্যক্ষই বিদ্যালয়সমূহৰ পৰিদৰ্শকলৈ জাননী জাৰি কৰিছে । জাননী অনুসৰি 2024 বৰ্ষৰ ফেব্ৰুৱাৰী মাহৰ প্ৰথম সপ্তাহত অনুষ্ঠিত হ'বলগীয়া হাইস্কুল শিক্ষান্ত পৰীক্ষাত পৰীক্ষাৰ্থীয়ে অ' এম আৰ শ্বীটযোগে পৰীক্ষাত অৱতীৰ্ণ হ'ব ।
জাননী অনুসৰি শিক্ষাৰ্থীসকলে ইতিমধ্যেই গুণোৎসৱৰ জৰিয়তে অ' এম আৰ শ্বীটৰ সাম্যক ধাৰণা লাভ কৰিছে । যাৰ বাবে 2024 বৰ্ষত 50% প্ৰশ্নোত্তৰৰ বাবে অ' এম আৰ শ্বীটৰ ব্যৱস্থা কৰা হ'ব । অৱশ্যে শিক্ষাৰ্থীসকলে এই সুবিধা ইংৰাজী, সাধাৰণ গণিত, সাধাৰণ বিজ্ঞান আৰু সমাজ বিজ্ঞান বিষয়ৰ বাবেহে লাভ কৰিব । এই চাৰিটা বিষয়ত 50% প্ৰশ্ন বস্তুনিষ্ঠ হোৱাৰ সমান্তৰালভাৱে উত্তৰ বহী 16 টা পেজত অন্তৰ্ভুক্ত হ'ব বুলি জাননীত উল্লেখ কৰা হৈছে ।