গুৱাহাটী, 18 ডিচেম্বৰ :গুৱাহাটী মহানগৰীত দীৰ্ঘদিনে বিশুদ্ধ খোৱাপানীৰ সমস্যাই এক জটিল সমস্যা হিচাপে দেখা দি আহিছে । চৰকাৰী পানী যোগান আঁচনিয়ে এতিয়াও মহানগৰীৰ আধাতকৈও অধিক লোকক যোগান ধৰিব পৰা নাই বিশুদ্ধ খোৱাপানী ৷ যাৰ ফলত এটুপি খোৱাপানীৰ বাবে প্ৰতিদিনে হাহাকাৰ কৰিবলগীয়া হয় মহানগৰবাসীয়ে ।
মহানগৰীৰ কাহিলীপাৰা, ভেটাপাৰা, বশিষ্ঠ চাৰিআলি, খানাপাৰা, ৰাজগড়, অনিল নগৰ, নবীন নগৰ, চানমাৰি, শিলপুখুৰী, জু-ৰোড, পাণবজাৰ, গণেশগুৰি, দিশপুৰ, হাতীগাঁওকে আদি কৰি মহানগৰীৰ কেইবাঠাইতো খোৱাপানীৰ তীব্ৰ নাটনি হোৱা পৰিলক্ষিত হৈছে ৷ জিএমচি আৰু গুৱাহাটী মহানগৰ খোৱাপানী অনাময় পৰিষদ আৰু জনস্বাস্থ্য কাৰিকৰী বিভাগৰ সৰু সৰু আঁচনিয়ে মহানগৰবাসীক পানী যোগান ধৰি আহিছে যদিও সেয়া পৰ্যাপ্ত নহয় । তদুপৰি জনস্বাস্থ্য কাৰিকৰী বিভাগৰ অধিকাংশ সৰু সৰু আঁচনি এতিয়াও বিকল হৈ আছে ।
গুৱাহাটী পৌৰ নিগমৰ তথ্য মতে (Guwahati Municipal Corporation), মহানগৰীৰ মাত্ৰ 30 শতাংশ লোকেহে চৰকাৰী আঁচনিৰ খোৱাপানী লাভ কৰে । বাকী 70 শতাংশ মহানগৰবাসীয়ে চৰকাৰী খোৱাপানী আঁচনি (Guwahati Water Supply Scheme) ৰ সুবিধাৰ পৰা এতিয়াও বঞ্চিত হৈ আছে ।
বৰ্তমানৰ জনসংখ্যা অনুযায়ী গুৱাহাটীত দৈনিক 328.86 নিযুত লিটাৰ খোৱাপানীৰ প্ৰয়োজন । কিন্তু খোৱাপানীৰ যোগান ধৰি অহা তিনিটাকৈ চৰকাৰী বিভাগ ক্ৰমে- গুৱাহাটী পৌৰ নিগম(Guwahati Municipal Corporation), জনস্বাস্থ্য কাৰিকৰী বিভাগ আৰু গুৱাহাটী মহানগৰ পানী যোগান আৰু অনাময় পৰিষদে ইয়াৰে মাত্ৰ 72.40 নিযুত লিটাৰ পানীহে যোগান ধৰিবলৈ সক্ষম হয় । অৰ্থাৎ মহানগৰীত দৈনিক 256.46 নিযুত লিটাৰ খোৱাপানীৰ অভাৱ থাকে ।
উল্লেখ্য যে, মহানগৰীৰ শ্ৰীনগৰ সাৰ্বজনীন পূজা সমিতিৰ চৌহদত থকা শ্ৰীনগৰ পানী যোগান আঁচনিখন বিগত প্ৰায় ৯ বছৰ ধৰি বিকল হৈ আছে (Srinagar water supply Scheme) । প্ৰায় ১ কোটি টকা ব্যয় সাপেক্ষে জনস্বাস্থ্য কাৰিকৰী বিভাগে নিৰ্মাণ কৰিছিল এই পানী যোগান আঁচনিখন । কিন্তু নিৰ্মাণৰ এবছৰ নহওঁতেই বিকল হৈ পৰে এই আঁচনি ।