গুৱাহাটী, ২১ নৱেম্বৰ :বিশ্বৰ ফেশ্বন জগতৰ অন্যতম শ্রেষ্ঠ আলোচনী হিচাপে চিহ্নিত LOfficiel ৰ শেহতীয়া সংস্কৰণত অসম কন্যা তথা প্রসিদ্ধ ফেশ্বন ডিজাইনাৰ সংযুক্তা দত্তৰ বস্ত্ৰ পৰিধান কৰা মডেলৰ ফটো প্ৰকাশিত হৈছে । আন এখন আলোচনী Harper’s Bazar Vietnam ৰ বাবেও তেঁওৰ ডিজাইনাৰ ড্ৰেছ নিৰ্বাচিত হৈছে বুলি জানিবলৈ দিছে সংযুক্তা দত্তই ৷
আধুনিক মহিলাৰ বাবে “দ্য লাক্সাৰী বাইবেল' হিচাপে সুপৰিচিত 'দ্য ল’অফিচিয়েল'ত মাত্র এখন ফটো প্ৰকাশৰ বাবে বিশ্বৰ সুন্দৰী মডেলে বছৰৰ পাছত বছৰ ধৰি অধীৰ আগ্ৰহেৰে অপেক্ষা কৰে । এনে সময়তে অসম কন্যা, ফেশ্বন ডিজাইনাৰ সংযুক্তা দত্তৰ বস্ত্ৰ পৰিধান কৰি মডেল নয়না বিছভাই আমেৰিকাৰ নিউয়র্ক চিটিত মেগাজিনৰ বাবে ফটো শ্বুট কৰাটো নিশ্চয়কৈ আমাৰ সকলোৰে বাবে গৌৰৱৰ কথা ৷ সমান্তৰালভাৱে মডেল নয়নাৰ এই আকর্ষণীয় ফটো ‘ল’অফিচিয়েল'ত প্ৰকাশ হোৱাৰ লগে লগে বিশ্বৰ ফেশ্বন জগতখনত স্বাভাৱিকতে সৃষ্টি হৈছে তীব্ৰ কৌতূহল আৰু চৰ্চাৰ । উল্লেখ্য যে অসমৰ থলুৱা ৰেচমী সূতাৰে ডিজাইন কৰা সংযুক্তা দত্তৰ অত্যাধুনিক ফেশ্বন ডিজাইনিঙৰ বস্ত্ৰই ইতিমধ্যে বিশ্বজুৰি খ্যাতি অৰ্জন কৰিবলৈ সক্ষম হৈছে ।
অভিযান্ত্ৰিকৰ স্নাতক ডিগ্ৰীধাৰী সংযুক্তা দত্তই চৰকাৰী চাকৰি বাদ দি অসমৰ থলুৱা পাট-মুগাক অনন্য ৰূপত বিশ্বত জনপ্রিয় কৰাৰ এক সপোনমুখী যাত্ৰা আৰম্ভ কৰিছিল । স্পষ্টতঃ অসমৰ চহকী ৰেচমী সূতাক থলুৱা আৰু আধুনিকতাৰে সংমিশ্ৰণ কৰি নিজ শৈলীৰে মেখেলা-চাদৰ তথা আন আন ডিজাইন লৈ প্ৰস্তুত কৰা বস্ত্ৰ পৰিধান কৰি ইতিমধ্যে বিশ্বৰ আগশাৰীৰ মডেল তথা অভিনেত্ৰীয়ে ৰেম্পত কেটৱাক কৰি বিশ্ববাসীৰ দৃষ্টি আকৰ্ষণ কৰিবলৈ সক্ষম হৈছে ।