১০ জন অখিল গগৈয়েও মোক হৰুৱাব নোৱাৰে: ৰূপজ্যোতি কুৰ্মী

"প্ৰভুৱে যেতিয়া জয়ী কৰাব বিচাৰে তেতিয়া অখিল গগৈ(AKHIL GOGOI)য়ে ক'ত হৰুৱাব পাৰিব । প্ৰভুৰ ওপৰতে সকলো কথা । তেওঁৰ এটা ভোট নাপালেও একো নাই সমষ্টিৰ ৰাইজে ভোটদান কৰিব । সমষ্টিৰ গৰিষ্ঠ সংখ্যক ৰাইজে মোক ভোট দি আহিছে আৰু আগলৈও দিব । এইবাৰো মই জয়ী হ'ম"। বাজেট অধিৱেশনৰ দ্বিতীয় দিনা মঙলবাৰে এই মন্তব্য কৰে ন-বিজেপি নেতা ৰূপজ্যোতি কুৰ্মীয়ে ।

গুৱাহাটী, ১৩ জুলাই: মৰিয়নী সমষ্টিৰ উপ-নিৰ্বাচনত টিকট পাব নে নাই সেয়া নিশ্চিত হোৱা নাই যদিও নতুনকৈ বিজেপিত যোগদান কৰা ৰূপজ্যোতি কুৰ্মী কিন্তু জয়ী হ'ব বুলি দৃঢ় বিশ্বাসী হৈ আছে । কংগ্ৰেছৰ হৈ মৰিয়নীৰ পৰা ৪ বাৰকৈ বিধায়ক হোৱা ৰূপজ্যোতি কুৰ্মীয়ে নিৰ্বাচনত জয়ী হোৱাৰ পাছতো কংগ্ৰেছ দল আৰু বিধায়ক পদ ত্যাগ কৰি বিজেপিত যোগদান কৰে । অসম বিধানসভাৰ বাজেট অধিৱেশনৰ মাজতে মঙলবাৰে বিধানসভা চৌহদত ৰূপজ্যোতি কুৰ্মীয়ে সংবাদ মাধ্যমৰ আগত পুনৰ বিধায়ক অখিল গগৈৰ বিৰুদ্ধে সৰৱ হৈ পৰে । তেওঁ কয়, ' দহজন অখিল গগৈ আহিলেও মোক মৰিয়নী সমষ্টিত হৰুৱাব নোৱাৰে । আনকি ১০ জন ৰিপুণ বৰা, ১০ জন ৰকিবুল হুছেইন, ১০ জন গৌৰৱ গগৈ আহিলেও মোক হৰুৱাব নোৱাৰে ।'

ৰূপজ্যোতি কুৰ্মী

সকলোকে প্ৰত্যাহ্বান জনাই ৰূপজ্যোতি কুৰ্মীয়ে কয়, 'প্ৰভুৱে যেতিয়া জয়ী কৰাব বিচাৰে তেতিয়া অখিল গগৈয়ে ক'ত হৰুৱাব পাৰিব । প্ৰভুৰ ওপৰতে সকলো কথা । তেওঁৰ এটা ভোট নাপালেও একো নাই সমষ্টিৰ ৰাইজে ভোটদান কৰিব । সমষ্টিৰ গৰিষ্ঠসংখ্যক ৰাইজে মোক ভোট দি আহিছে আৰু আগলৈও দিব' ।

লগতে তেওঁ এইবাৰো জয়ী হ'ব বুলি মন্তব্য কৰে । প্ৰাৰ্থিত্ব লাভ কৰা সন্দৰ্ভত তেওঁ কয়, 'মোক প্ৰাৰ্থিত্ব দিব নে নাই সেয়া দলীয় নেতৃত্বৰ ওপৰত নিৰ্ভৰ কৰিব । কিন্তু বিজেপিয়ে যাকেই প্ৰাৰ্থিত্ব নিদিয়ক কিয়, মৰিয়নীত বিপুল ভোটত জয়ী হৈ আহিব' ।

বিজেপি চৰকাৰৰ কাম-কাজক লৈ অসমৰ ৰাইজ সন্তুষ্ট ব‍াবেই দ্বিতীয়বাৰলৈ চৰকাৰ গঠন কৰাৰ সুবিধা দিছে বুলিও তেওঁ মন্তব্য কৰে । আনহাতে ৰাইজৰ দলে কংগ্ৰেছৰ লগত মিত্ৰতা কৰা মানে এআইইউডিএফ(AIUDF)ৰ লগত মিত্ৰতা কৰা । অসমৰ ৰাইজে সকলো দেখি আছে আৰু সকলো বুজি পায় । লগতে উপ-নিৰ্বাচন(BY-ELECTION)ত ৰাইজে সঠিক উত্তৰ দিব বুলি তেওঁ মন্তব্য কৰে । নিজকে হাতীৰ সৈতে তুলনা কৰি ৰূপজ্যোতি কুৰ্মীয়ে কয়, 'হাতী গৈ থাকিলে কুকুৰে ভূকেই । দেউতা-মা আৰু মৰিয়নী সমষ্টিৰ ৰাইজৰ আশীৰ্বাদত মই পুনৰ জয়ী হ'ম । ৰাখে হৰি মাৰে কোনে, মাৰে হৰি ৰাখে কোনে' ।

লগতে পঢ়ক: এনকাউণ্টাৰক লৈ পুনৰ সৰৱ বিধায়ক অখিল গগৈ