জাহাংগীৰ আৰ্ট গেলেৰীত অসম গৌৰৱ ৰবীন বৰৰ 'ইনকাৰনেছন'

মুম্বাইস্থিত জাহাংগীৰ আৰ্ট গেলাৰীত এখন একক চিত্ৰ প্ৰদৰ্শনী অনুষ্ঠিত হ'ব চিত্ৰ তথা ভাস্কৰ্য শিল্পী অসম গৌৰৱ ৰবীন বৰৰ ৷

গুৱাহাটী, ২৭ ফেব্ৰুৱাৰীঃব্যতিক্ৰমী চিত্ৰ শৈলীৰে ৰাষ্ট্ৰীয় তথা আন্তঃৰাষ্ট্ৰীয় ক্ষেত্ৰত নিজকে প্ৰতিষ্ঠা কৰিবলৈ সক্ষম হোৱা চিত্ৰ তথা ভাস্কৰ্য শিল্পী অসম গৌৰৱ ৰবীন বৰৰ এখন একক চিত্ৰ প্ৰদৰ্শনী অনুষ্ঠিত হ'ব মুম্বাইস্থিত জাহাংগীৰ আৰ্ট গেলাৰীত । "ইনকাৰনেচন" শীৰ্ষক এই প্ৰদৰ্শনীখন ২ মাৰ্চৰ পৰা ৮ মাৰ্চলৈকে অনুষ্ঠিত হ'ব । প্ৰদৰ্শনীখনত ঠাই পাব স্পীড্ পেইন্টাৰ ৰূপে পৰিচিত ৰবীন বৰৰ যাদুকৰী হাতৰ পৰশত সৃষ্টি হোৱা প্ৰায় চল্লিছখন চিত্ৰই ৷ মুখ্যত এক্ৰিলিক মাধ্যমত অংকিত চিত্ৰসমূহৰ বিষয়বস্তু, পৌৰাণিক তথা বৈদিক আখ্যানৰ কিছুমান বিশেষ চৰিত্ৰৰ ওপৰত আধাৰিত । প্ৰসিদ্ধ চিত্ৰ শিল্পী গৰাকীয়ে সাংবাদিকৰ আগত কয় যে ভাৰতীয় হিন্দুসকলে ভগৱান ৰূপে মানি অহা বিষ্ণুৰ বিভিন্ন মানৱী অৱতাৰে মানুহৰ অন্তৰত বাৰুকৈয়ে প্ৰভাৱ বিস্তাৰ কৰি আছে । শ্ৰী কৃষ্ণ, ৰাম, বুদ্ধ আদিৰ এই অৱতাৰসমূহ ভাৰতীয় সংস্কৃতিৰো এক অংগ স্বৰূপ । যেতিয়াই পৃথিৱীত শান্তি বিনষ্ট হয় আৰু অপশক্তিৰ প্ৰাদুৰ্ভাৱ ঘটে তেতিয়াই ভগৱানৰ অৱতাৰী ৰূপৰ আৱিৰ্ভাৱ হয় আৰু তেওঁৰ দ্বাৰাই জগতত পুনৰ শান্তি প্ৰতিষ্ঠা হয় । মানুহৰ মনত এক বিশ্বাস আছে যে ,এই অৱতাৰী পুৰুষৰ পৰা লাভ কৰা শক্তিয়ে মানৱজাতিক সঠিক দিশত আগবঢ়াই নিয়াত সহায় কৰি আহিছে । এনে এক বাৰ্তাৰে অংকিত চিত্ৰসমূহৰ ভিতৰত অন্যতম Incarnation-I আৰু Incarnation-II, The Divine Love-I আৰু The Divine Love-II, Deprived, The Creator, Perception, Devi-I আৰু Devi-II, Compulsion আদি ।

উল্লেখযোগ্য যে, এছিয়ান বুক অৱ ৰেকৰ্ডচ, ইন্ডিয়ান বুক অৱ ৰেকৰ্ডচ, জিনিয়াছ ৱৰ্ল্ড ৰেকৰ্ড, আছাম বুক অৱ ৰেকৰ্ডচ ইত‍্যাদিত নিজৰ নাম অন্তৰ্ভুক্ত কৰা চিত্ৰশিল্পী ৰবীন বৰে ইতিমধ্যে ভাৰতৰ প্ৰায় বহু কেইখন ৰাজ্যতে নিজৰ চিত্ৰ প্ৰদৰ্শনী অনুষ্ঠিত কৰিছে। তদুপৰি Zee TV, Zee News, ETV Bangla, ETV Marathi, Tamil, Telugu আদি কৰি বহু স্থানীয় টিভি চেনেলত নিজৰ সৃষ্টিশীলতা প্ৰদৰ্শন কৰি জনপ্ৰিয় আৰু প্ৰশংসিত হৈছে । ভাৰতৰ প্ৰাক্তন ৰাষ্ট্ৰপতি এ পি জে আব্দুল কালাম আৰু বৰ্তমানৰ উপ ৰাষ্ট্ৰপতি ভেংকয়া নাইডুৱে ৰবীন বৰৰ সৃষ্টিশীলতাক বিশেষভাৱে সমাদৰ দিছে । ভাৰতৰ বিখ্যাত জাহাংগীৰ আৰ্ট গেলাৰীত অনুষ্ঠিত হ'ব লগা এই প্ৰদৰ্শনীৰ উন্মোচনী অনুষ্ঠানত দেশৰ ভালে কেইগৰাকী বিখ্যাত ব্যক্তিয়ে অংশগ্ৰহণ কৰিব । বিশিষ্ট চিত্ৰশিল্পী তথা কবি ৰণজিৎ কুমাৰ ৰাউট, পদ্মভূষণ তথা প্ৰথিতযশা বোলছবি নিৰ্মাতা জাহ্নু বৰুৱা, বোলছবি অভিনেতা অশোক কুলকাৰ্ণী, মুখ্য কাৰ্যবাহী সঞ্চালক, ইণ্ডিয়ান আৰ্ট প্ৰমোটৰ সুদীপ চক্ৰৱৰ্তী, ডাঃ জ্যোতিৰ্ময় দাস, আছাম এছ'ছিয়েচন মুম্বাই, বিখ্যাত চিত্ৰশিল্পী ৰামজী শৰ্মা, গৌতম মুখাৰ্জীকে মুখ্য কৰি আন ভালে সংখ্যক লোকে অংশ গ্ৰহণ কৰিব ৷

লগতে পঢ়কঃঅৰুণাচলত অবৈধ আফিং খেতিৰ বিৰুদ্ধে আৰক্ষীৰ অভিযান !