গুৱাহাটী, ১ জুলাই:পথচাৰীসকল সাৱধান হওক ৷ মহানগৰীত সুৰাসক্ত চালকৰ সন্ত্ৰাস ৷ বলীউডৰ চিনেমাৰ দৰেই মহানগৰীৰ ৰাজপথত সুৰাসক্ত চালকৰ এক্সন ৷ এখন ফৰ্চুনাৰ বাহনে এফালৰ পৰা মহতিয়াই নিয়ে কেইবাখনো বাহন। গুৱাহাটীৰ ওদালবাক্ৰাত শনিবাৰে নিশা প্ৰায় ৮.৩০ বজাত এখন ফৰচুনাৰ বাহনৰ সন্ত্ৰাসত ত্ৰাসিত হৈ পৰে সমগ্ৰ অঞ্চলটো ৷ এই ঘটনাত কেইবাজনো লোক গুৰুতৰভাৱে আহত হয়।
ঘটনাৰ বিৱৰণী অনুসৰি এছ-০১-ডি এন-৭১২৪ নম্বৰৰ এখন ফৰ্চুনাৰ বাহনে গনেশগুৰি দিশৰ পৰা কাহিলীপাৰা পথেৰে লালগনেশ অভিমুখে আহি থকা অৱস্থাত দক্ষিণগাঁও, পাৱাৰ হাউচ আদিকে ধৰি কেইবাটাও স্থানত দুৰ্ঘটনা সংঘটিত কৰে। সুৰাসক্ত অৱস্থাত থকা বাহনখনৰ চালকজনে কেইবাটাও স্থানত দুৰ্ঘটনা সংঘটিত কৰি পলায়ন কৰি আহি ওদালবাক্ৰাৰ হায়াত হাস্পতালৰ সমীপৰ যান-জঁটত আৱদ্ধ হৈ পৰে। দুৰ্ঘটনা সংঘটিত কৰি অহা বুলি জানিব পাৰি স্থানীয় লোকে বাহনখন ৰখাবলৈ চেষ্টা কৰে।