গুৱাহাটী,৮ মে': বানপানীৰ সমস্যাই প্ৰতিবছৰে জৰ্জৰিত কৰি আহিছে ৰাজ্যখনক। বানপানী হোৱাৰ পূৰ্বেই মথাউৰি নিৰ্মাণ আৰু মেৰামতিৰ ক্ষেত্ৰত উচিত ব্যৱস্থা গ্ৰহণ কৰিলে বহু পৰিমাণে এই জ্বলন্ত সমস্যাৰ পৰা হাত সাৰিব পৰা যায়। এই বছৰো ভগা মথাউৰি নিৰ্মাণৰ ক্ষেত্ৰত প্ৰতিবন্ধকতা আহিছিল। অগা পিচাকৈ পঞ্চায়ত নিৰ্বাচন আৰু লোকসভা নিৰ্বাচনৰ বাবে নিৰ্বাচনী আচৰণবিধি বলবৎ হোৱাত টকা আবন্টন দিব পৰা নাছিল জলসম্পদ বিভাগে। যি কথা ইতিমধ্যে ইটিভি ভাৰতৰে হোৱা এক সাক্ষাৎকাৰত নিজমুখে স্বীকাৰ কৰিছে ৰাজ্যৰ জলসম্পদ মন্ত্ৰী কেশৱ মহন্তই। কিন্তু মঙলবাৰে অৰ্থাৎ ৭ মে'ত দেশৰ নিৰ্বাচন আয়োগে অসমৰ বিশেষ পৰিস্থিতিৰ প্ৰতি লক্ষ্য ৰাখি এই ক্ষেত্ৰত থকা আচৰণবিধি শিথিল কৰি ৰাজ্যৰ মুখ্য সচিবলৈ এখন পত্ৰ প্ৰেৰণ কৰিছে, যাৰ ফলত এতিয়া জলসম্পদ বিভাগে ততাতৈয়াকৈ বাকী ৰৈ যোৱা কামসমূহ সম্পূৰ্ণ কৰিব পাৰিব।
শিথিল কৰা হৈছে নিৰ্বাচন আচৰণবিধি