গুৱাহাটী, ২৬ জুলাই: অসম চৰকাৰৰ সামাজিক ন্যায় আৰু সৱলীকৰণ বিভাগৰ মন্ত্ৰী পীযুষ হাজৰীকাই বুধবাৰে জনতা ভৱনত বিভাগীয় বিষয়াৰ উপস্থিতিত অসম জ্যেষ্ঠ নাগৰিক সন্মিলন, দিব্যাংগ ব্যক্তিৰ কেইবাটাও সংগঠন আৰু নিচামুক্তি কেন্দ্ৰৰ স্বত্বাধিকাৰীসকলৰ নৱগঠিত সংগঠনৰ প্ৰতিনিধিবৰ্গৰ সৈতে সুকীয়াকৈ তিনিখন পৰ্যালোচনা বৈঠকত মিলিত হয় |
প্ৰথমখন সভাত মন্ত্ৰী হাজৰীকাই অসম জ্যেষ্ঠ নাগৰিক সন্মিলনৰ কাৰ্যকৰী সভাপতি বাণেশ্বৰ খাউণ্ডৰ নেতৃত্বত অহা প্ৰতিনিধিবৰ্গৰ পৰা জ্যেষ্ঠ নাগৰিকসকলৰ সুবিধাৰ বাবে তেওঁলোকৰ পৰামৰ্শ গ্ৰহণ কৰে | জ্যেষ্ঠ নাগৰিকসকলৰ বাবে কৰিব পৰা আন কেইবাটাও কাম আৰু বিষয় সন্দৰ্ভত তেওঁলোকে মন্ত্ৰীগৰাকীৰ দৃষ্টিগোচৰ কৰাত মন্ত্ৰী হাজৰীকাই উপস্থিত সামাজিক ন্যায় আৰু সৱলীকৰণ বিভাগৰ প্ৰধান সচিবক এই ক্ষেত্ৰত প্ৰয়োজনীয় কাম কৰিবলৈ নিৰ্দেশনা প্ৰদান কৰে |
আনহাতে জ্যেষ্ঠ নাগৰিকসকলৰ কল্যাণৰ বাবে ইতিপূৰ্ৱেই সিদ্ধান্ত গ্ৰহণ কৰা অনুসৰি পৰামৰ্শদাতা সমিতি গঠন আৰু সভা অনুষ্ঠিত কৰাৰ বাবেও মন্ত্ৰী হাজৰীকাই বিভাগক নিৰ্দেশনা প্ৰদান কৰে | বুধবাৰৰ বৈঠকত জ্যেষ্ঠ নাগৰিকসকলৰ পেঞ্চন, স্বাস্থ্যসেৱা আদিৰ বিষয়তো আলোচনা কৰা হয় |
আনহাতে বিগত বৰ্ষৰ দৰে এই বৰ্ষও অহা ১ অক্টোবৰৰ আন্তঃৰাষ্ট্ৰীয় বয়সস্থ লোকৰ দিৱস সামাজিক ন্যায় আৰু সৱলীকৰণ বিভাগৰ উদ্যোগত পালন কৰা হ’ব বুলি মন্ত্ৰীগৰাকীয়ে জ্যেষ্ঠ নাগৰিক সন্মিলনৰ প্ৰতিনিধি বৰ্গক জানিবলৈ দিয়ে | আজিৰ আন এখন বৈঠকত মন্ত্ৰী হাজৰীকাই অসমৰ দিব্যাংগসকলৰ কেইবাটাও সংগঠনৰ নেতৃবৃন্দৰে তেওঁলোকৰ বিভিন্ন বিষয় আৰু সমস্যাৰ বিষয়ে আলোচনা কৰে |