গুৱাহাটীৰ মাজমজিয়াৰ পৰা ব্যৱসায়ী নিৰুদ্দেশ

উত্তৰ-পূৱৰ দুৱাৰমুখ গুৱাহাটীৰ পৰা পুনৰ এগৰাকী প্ৰতিষ্ঠিত ব্যৱসায়ী নিৰুদ্দেশ হৈছে । ২৫ আগষ্টৰ পৰাই সন্ধান নাই ব্যৱসায়ীগৰাকীৰ । ব্যৱসায়ীগৰাকীক কোনোৱে অপহৰণ কৰিলে নেকি ? নে ব্যৱসায়ীগৰাকীয়ে আত্মগোপন কৰিছে ? আৰক্ষীয়ে ইতিমধ্যে তদন্ত আৰম্ভ কৰিছে ।

গুৱাহাটী,২৭ আগষ্ট : ৰাজধানী চহৰ গুৱাহাটীত পুনৰ ব্যৱসায়ী নিৰুদ্দেশ হোৱাৰ ঘটনা সংঘটিত হৈছে । এইবাৰ গুৱাহাটীৰ হাতীগাওঁ চাৰিআলি অঞ্চলৰ পৰা ৰহস্যজনকভাৱে সন্ধানহীন হৈ আছে ৰিয়েল ইষ্টেট ব্যৱসায়ৰ (Real estate Business) লগত জড়িত থকা এজন প্ৰতিষ্ঠিত ব্যৱসায়ী । মহানগৰীৰ গীতানগৰ থানাৰ অন্তৰ্গত নাৰেংগী-জু ৰোডৰ মনালিছা পথৰ নিৱাসী নিৰুদ্দিষ্ট ব্যৱসায়ীজন হৈছে ৫৫ বছৰীয়া শ্ৰীধৰ বেৰীৱালা ।

আৰক্ষীৰ সূত্ৰৰ পৰা জানিব পৰা মতে, ব্যৱসায়ী জনে যোৱা প্ৰায় ২০ বছৰ ধৰি মনালিছা পথত এটা ভাড়াঘৰত কাৰ্যালয় স্থাপন কৰি ৰিয়েল ইষ্টেটৰ ব্যৱসায় কৰি আছিল । যোৱা ২৫ আগষ্টত দিনৰ ভাগত AS-০১-EA-৭০৯৬ নম্বৰৰ নিজৰ ব্যক্তিগত বাহনখন লৈ শ্ৰীধৰ বেৰিৱালাই ব্যৱসায় সংক্ৰান্তত ঘৰৰ পৰা ওলাই গৈছিল । সিদিনাৰ পৰাই প্ৰতিষ্ঠিত ব্যৱসায়ী জন ৰহস্যজনকভাৱে নিৰুদ্দেশ হৈ আছে ।

ইফালে ঘটনা সন্দৰ্ভত ব্যৱসায়ী জনৰ প্ৰতিষ্ঠানত কৰ্মৰত কৰ্মচাৰী মহেন্দ্ৰ চন্দ্ৰ দাসে গীতানগৰ থানাত শুকুৰবাৰে এখন এজাহাৰ দাখিল কৰিছে । এজাহাৰৰ ভিত্তিত গীতানগৰ আৰক্ষীয়ে থানাত এটা গোচৰ ৰুজু কৰি ব্যৱসায়ী জনৰ সন্ধানত তদন্ত প্ৰক্ৰিয়া অব্যাহত ৰাখিছে । জানিব পৰা মতে সন্ধানহীন হোৱা ব্যৱসায়ীজনৰ পত্নী সহ পৰিয়াল কলকাতাত থাকে । কিন্তু পৰিয়ালৰ লগত তেওঁৰ সম্পৰ্ক ভাল নাছিল বুলি জানিবলৈ দিছে তেওঁৰ ব্যৱসায়ৰ লগত জড়িত একাংশ লোকে ।

আন একাংশৰ মতে ব্যৱসায়িক সংক্ৰান্তত বহু লোকৰ পৰা টকা ধাৰলৈ লৈছিল ব্যৱসায়ীজনে । কিন্তু সময়ত ধন উভতাই দিব নোৱাৰাত এনেদৰে আত্মগোপন কৰিছে বুলি একাংশই সন্দেহ কৰিছে । অৱশ্যে আৰক্ষীৰ সঠিক তদন্তৰ পাছত হে ঘটনাৰ ৰহস্য ফাদিল হ'ব ।

লগতে পঢ়ক :AIUDF ৰ বিধায়ক সকলো বিজেপিৰে বিধায়ক : অখিল