মহানগৰীৰ গড়কাপ্তানী বিভাগৰ প্ৰেক্ষাগৃহত ৰঞ্জিত দাসৰ সংবাদমেল

বৃহস্পতিবাৰে গড়কাপ্তানী বিভাগৰ প্ৰেক্ষাগৃহত এক সংবাদমেল সম্বোধন কৰে বিজেপিৰ ৰাজ্যিক সভাপতি ৰঞ্জিত দাসে ৷ সংবাদমেলত উপস্থিত থাকে সাংসদ দিলীপ শইকীয়াও ৷

গুৱাহাটী, 2 জানুৱাৰীঃবৃহস্পতিবাৰে গড়কাপ্তানী বিভাগৰ প্ৰেক্ষাগৃহত এক সংবাদমেল সম্বোধন কৰে বিজেপিৰ ৰাজ্যিক সভাপতি ৰঞ্জিত দাসে ৷তেওঁ কয়, আজি এক ধূসৰিত পৰিৱেশত অসমৰ ৰাইজে বসবাস কৰিবলগীয়া হৈছে ৷ যিটো কেৱল অসমবাসীৰ নজনাৰ কাৰণ আৰু একাংশ লোকৰ বিভিন্ন বিভ্ৰান্তিমূলক কথাৰ বাবে ৷ ইয়াৰ লগতে তেওঁ কয়, সৰ্বানন্দ সোণোৱাল চৰকাৰ থকালৈকে এজনো বিদেশী অসমত থাকিব নোৱাৰে ৷

কংগ্ৰেছ দলে জাপি দিয়া বোজা আজি অসমে সহিবলগীয়া হৈছে ৷ কিন্তু সেই কংগ্ৰেছ দলে আৰু কমিউনিষ্টসকলে আজি চল চাই কঠীয়া পৰাৰ দৰে সেই সময়ৰ গণ শত্ৰুৱে বৰ্তমান গণ মিত্ৰৰ ভূমিকা ল'বলৈ প্ৰচেষ্টা চলাইছে বুলিও উল্লেখ কৰে বিজেপিৰ সভাপতি গৰাকীয়ে ৷

ভাৰতবৰ্ষত দশকে দশকে বসবাস কৰি থকা শৰণাৰ্থীসকলৰ বাবে বিহীত ব্যৱস্থা লোৱাটো বিজেপিৰ পূৰ্ব প্ৰতিশ্ৰুতি আছিল ৷ বিজেপিয়ে আগন্তুক দিনত অসমীয়া ভাষা ৰক্ষাৰ বাবে কৰণীয়খিনি সম্পূৰ্ণ কৰিব লাগিব ৷ বিজেপিৰ বিশ্বাস যে, প্ৰধান মন্ত্ৰী নৰেন্দ্ৰ মোডীয়ে সংবিধান সংশোধন কৰি হ'লেও অসমীয়া ভাষাক যুগ-যুগান্তৰৰ বাবে অসমৰ ৰাজ্য ভাষা হৈ থকাৰ বাবে ব্যৱস্থা ল'ব ৷

ৰঞ্জিত দাসে লগতে কয় যে, চাবুৱা কাণ্ডত কংগ্ৰেছী সদস্য, মাওবাদী আৰু কৃষক মুক্তি মৰ্চাৰ লোক জড়িত আছে ৷

সংবাদমেলত উপস্থিত থাকে সাংসদ দিলীপ শইকীয়াও ৷ তেওঁ কয় যে, তেওঁলোকে যেনেদৰে ৰাইজক সচেতন কৰিব লাগিছিল তেনেদৰে হয়তো নকৰিলে ৷ সেয়ে অপপ্ৰচাৰে মূল কথাখিনি ঢাকি ৰাখিলে ৷