গুৱাহাটী, 13 জুনঃ শনিবাৰে নুনমাটি আৰক্ষী চকীৰ সন্মুখত দেখিবলৈ পোৱা গ'ল শতাধিক লোকৰ তীব্ৰ প্ৰতিবাদ ৷ শুকুৰবাৰে সামান্য কোনো কথাত তৰ্ক-বিতৰ্ক হোৱাৰ বাবেই দিনৰ পোহৰতে চোকা অস্ত্ৰৰে আঘাত কৰি হত্যা কৰা হৈছিল ঋতুপৰ্ণ পেগু নামৰ লোকজনক ৷ গাড়ীচালকৰ কাম কৰিছিল ছিলাপথাৰৰ চান্দমাৰীৰ নিবাসী ঋতুপৰ্ণ পেগুৱে ৷ তেওঁ পৰিয়ালসহ থাকিছিল গুৱাহাটীৰ কমাৰ্চ কলেজৰ সমীপৰ এটা ভাড়াঘৰত ।
অভিযোগ অনুসৰি হুছেইন আলী নামৰ লোক এজনৰ লগতে তেওঁৰ পৰিয়ালৰ অস্ত্ৰাঘাতত ঘটনাস্থীতে মৃত্যুক সাৱটি লৈছিল ঋতুপৰ্ণ পেগুই ৷ শনিবাৰে ঋতুপৰ্ণ পেগুৰ মৃত্যুৰ ন্যায় বিচাৰি, অভিযুক্ত অপৰাধীৰ উপযুক্ত শাস্তি দিয়াৰ দাবীৰে শতাধিক লোকে উত্তল কৰি তুলিলে নুনমাটি আৰক্ষী চকী ৷ ৰাইজৰ দাবী ফাষ্টট্ৰেক আদালতত গোচৰ চলাই শীঘ্ৰেই দোষীক উচিত শাস্তি প্ৰদান কৰা ৷ ৰাইজৰ উত্তাল প্ৰতিবাদৰ বাবে নুনমাটি আৰক্ষী চকীত উপস্থিত হয় আৰক্ষী আয়ুক্ত মুন্না প্ৰসাদ গুপ্তা ৷ প্ৰতিবাদী জনতাক দোষীয়ে উচিত শাস্তি পাব বুলি তেওঁ আশ্বাস প্ৰদন কৰিছে ৷
লগতে পঢ়কঃদিনৰ পোহৰতে নুনমাটিত নৃংশস হত্যাকাণ্ড
