গুৱাহাটী,11 মাৰ্চঃ অসম বিধানসভাৰ বাজেট অধিৱেশন চলি থকাৰ মাজতে বুধবাৰে লাষ্টগেটত নিজৰ ভৱিষ্যত সুৰক্ষিত কৰিবলৈ প্ৰতিবাদত বহিবলৈ বাধ্য হ'ল গড়কাপ্তানী বিভাগৰ সহকাৰী আৰু কনিষ্ঠ অভিযন্তাসকল । বিগত ৬মাৰ্চত ৰাজ্য চৰকাৰে এ পি এছ চি-ৰ সমপৰ্যায়ৰ লিখিত আৰু মৌখিক পৰীক্ষাৰ অন্তত ১৫৫জন সহকাৰী অভিযন্তাক নিয়োগ কৰিছিল । এই সহকাৰী অভিযন্তাসকল এবছৰ ধৰি গড়কাপ্তানী বিভাগত কৰ্মৰত হৈ আছে ৷ ইয়াৰ পিছতো চৰকাৰে পুনৰবাৰ এই অভিযন্তাসকলৰ পদৰ লগতে ৩০৭জন কনিষ্ঠ অভিযন্তা নিয়োগৰ বাবে এ পি এছ চি-ৰ অধীনত পৰীক্ষা অনুষ্ঠিত কৰাৰ বাবে বিজ্ঞাপন মুকলি কৰিছে । লগতে ৫এপ্ৰিলত পদসমূহৰ পৰীক্ষা অনুষ্ঠিত কৰাৰ বাবে আয়োজন কৰা হৈছে । চৰকাৰৰ এই সিদ্ধান্তৰ বিৰোধিতা কৰি গড়কাপ্তানী বিভাগত কৰ্মৰত অভিযন্তাসকলে বুধবাৰে প্ৰতিবাদ সাব্যস্ত কৰে ৷ বিগত এবছৰ ধৰি বিভিন্ন চৰকাৰী কামত নিয়োজিত হোৱাৰ লগতে এই নিযুক্তি সম্পূৰ্ণ স্বচ্ছ আৰু নিকা আছিল বুলি দাবী কৰে অভিযন্তাসকলে ।
লাষ্টগেটত প্ৰতিবাদত বহিল গড়কাপ্তানী বিভাগৰ অভিযন্তা
এইবাৰ মহানগৰীৰ লাষ্টগেটত প্ৰতিবাদত বহিল গড়কাপ্তানী বিভাগৰ অভিযন্তাসকল । নিজৰ ভৱিষ্যত সুৰক্ষিত কৰিবলৈ গড়কাপ্তানী বিভাগৰ সহকাৰী আৰু কনিষ্ঠ অভিযন্তাসকল ওলাই আহিল লাষ্টগেটৰ প্ৰতিবাদস্থলীলৈ । তেজ দিম,চাকৰি নিদিওঁ,আমাৰ দাবী মানিব লাগিব আদি ধ্বনিৰে উত্তাল লাষ্টগেটৰ পৰিৱেশ ।
প্ৰতিবাদ গড়কাপ্তানী বিভাগৰ অভিযন্তাৰ
প্ৰতিবাদ সাব্যস্ত
যিহেতু অভিযন্তাসকলে লিখিত আৰু মৌখিক পৰীক্ষাত উত্তীৰ্ণ হৈ চাকৰিত যোগদান কৰিছিল, সেয়ে পুনৰবাৰ এই পৰীক্ষাত অৱতীৰ্ণ হোৱাৰ কোনোধৰণৰ যুক্তি নাই বুলি দাবী কৰে প্ৰতিবাদী অভিযন্তাসকলে । প্ৰতিবাদকাৰীসকলে চৰকাৰক শীঘ্ৰে উচিত পদক্ষেপ গ্ৰহণ কৰিবলৈ দাবী জনাইছে । লগতে উক্ত চাকৰিসমূহ নিয়মীয়াকৰণৰ ব্যৱস্থা গ্ৰহণ কৰিবলৈ চৰকাৰক অনুৰোধ জনাইছে ৷ প্ৰতিবাদকাৰীসকলে "তেজ দিম,চাকৰি নিদিওঁ" ধ্বনিৰে ৰাজ্য চৰকাৰক তীব্ৰ হুংকাৰ প্ৰদান কৰে ।
Last Updated : Mar 11, 2020, 4:57 PM IST