গুৱাহাটী,10 জুন:অসমৰ জনসাধাৰণৰ বাবে আজিও এটুপি বিশুদ্ধ খোৱাপানী মাত্ৰ এক অলীক সপোন ৷ বিশুদ্ধ খোৱাপানী যোগানৰ নামত জনস্বাস্থ্য কাৰিকৰী বিভাগত ব্যাপক দুৰ্নীতি সংঘটিত হৈ থকাৰ খবৰে সংবাদ শিৰোনামা দখল কৰি থকাৰ সময়তে বুধবাৰে বিভাগীয় মন্ত্ৰী ৰিহণ দৈমাৰীয়ে জনাইছে যে,অসমত বৰ্তমান 3,308টা পানী যোগান আঁচনি বিকল হৈ পৰিত্যক্ত অৱস্থাত আছে । কেন্দ্ৰীয় চৰকাৰৰ অৰ্থ সাহাৰ্যত অসমত আৰম্ভ হোৱা জল জীৱন মিছন নামৰ প্ৰায় 25,000কোটি টকীয়া এক অভিলাষী প্ৰকল্পৰ কথা ঘোষণা কৰিবলৈ সম্বোধন কৰা সংবাদমেলত ইটিভি ভাৰতৰ সাংবাদিকৰ এক প্ৰশ্নৰ উত্তৰত মন্ত্ৰীগৰাকীয়ে ৰাজ্যৰ মুঠ 8,238 খন পানী যোগান আঁচনিৰ উল্লিখিত সংখ্যক আঁচনি বিকল হৈ থকাৰ কথা প্ৰকাশ কৰে ৷ মন্ত্ৰীগৰাকীৰ মতে,বৰ্তমান কাৰ্যক্ষম হৈ থকা আঁচনিৰ সংখ্যা হৈছে 5,130খন ।
তাৎপৰ্যপূৰ্ণভাৱে বিভাগীয় সংবাদমেলত জল জীৱন মিছনে অনা সম্ভাৱনা সন্দৰ্ভত বাখ্যা আগবঢ়াই মন্ত্ৰী দৈমাৰীয়ে কয় যে,এই প্ৰকল্পই 2024 চনৰ ভিতৰত 61,75,178 টা পৰিয়ালক সংযোগ কৰিব ৷ এতিয়ালৈকে ৰাজ্য চৰকাৰে মাত্ৰ 1.17 লাখ পৰিয়াললৈ পাইপযোগে পানী যোগান ধৰাৰ ব্যৱস্থা গ্ৰহণ কৰিছে ৷ কিন্তু এই সংখ্যা ৰাজ্যৰ মুঠ পৰিয়ালৰ মাত্ৰ 2.2 শতাংশহে ৷ অৰ্থাৎ যিটো বিভাগে বিগত 45 বছৰত মাত্ৰ দুই শতাংশ পৰিয়াললৈহে পাইপৰ জৰিয়তে পানী যোগান ধৰিবলৈ সক্ষম হৈছে, সেই বিভাগে পৰৱৰ্তী তিনিবছৰৰ ভিতৰতে প্ৰায় 63 লাখ পৰিয়ালক খোৱা পানী যোগান ধৰিব পৰাতো একপ্ৰকাৰৰ প্ৰত্যাহ্বানৰ বিষয় হ’ব ৷