গুৱাহাটী, আগষ্ট 31 : এন আৰ চি সন্দৰ্ভত সংবাদমেল প্ৰফুল্ল কুমাৰ মহন্তৰ ৷ সংবাদ মাধ্যমক সম্বোধন কৰি প্ৰাক্তন মুখ্যমন্ত্ৰীগৰাকীয়ে কয় যে, আজি অসমবাসীৰ বাবে এটা ঐতিহাসিক দিন ৷ দীৰ্ঘদিনীয়া আশা-প্ৰত্যাশাৰ অন্তত আজি প্ৰকাশিত হ'ল এন আৰ চি ৷ বহু বাধা বিঘিনি নেওচি প্ৰতীক হাজেলাই এই কাম কৰিলে আৰু অসমৰ 55 হাজাৰ কৰ্মীয়ে নিঃস্বাৰ্থভাৱে কাম কৰাৰ ফল আজি অসমীয়াই লাভ কৰিলে বুলি মন্তব্য প্ৰাক্তন মুখ্যমন্ত্ৰীগৰাকীৰ ৷
সংবাদমেলতে অসম আন্দোলনৰ বহু প্ৰাক্তন সতীৰ্থক সোঁৱৰণ কৰিলে প্ৰফুল্ল কুমাৰ মহন্তই ৷ সাংবাদিকৰ প্ৰশ্নৰ উত্তৰত তেখেতে কয় যে, এন আৰ চি উচ্চতম ন্যায়ালয়ৰ নিৰ্দেশনাত হৈছে, অসুখী হোৱাৰ কিবা থাকিলে তাৰ বাবে চৰকাৰ দায়ী হ'ব ৷ ইয়াৰ লগতে প্ৰফুল্ল কুমাৰ মহন্তই আৰু কয় যে, ভটিয়নী সোঁতত মই যাব নিবিচাৰো । কিন্তু শুদ্ধ এন আৰ চিৰ বাবে ই এখন মাইলৰ খুঁটি হ'ব ৷
বিগত সময়ত অসমৰ জনসংখ্যা বৃদ্ধিৰ হাৰ সৰ্বভাৰতীয় তুলনাত আছিল দুগুণ, গতিকে বিদেশী বহিস্কাৰ কৰি একে সময়তে নাগৰিকত্ব সংশোধনী বিধেয়কৰ জৰিয়তে বিদেশী অনাৰ ব্যৱস্থা নকৰিবলৈ চৰকাৰক আহ্বান মহন্তৰ ৷
