গুৱাহাটী, 16 ডিচেম্বৰ :নাগৰিকত্ব সংশোধনী আইন সম্পৰ্কে প্ৰাক্তন মুখ্যমন্ত্ৰী প্ৰফুল্ল কুমাৰ মহন্তৰ সংবাদ মেল ৷ সংবাদমেলত মহন্তই কয় যে, কোনো কাৰণতে অসমৰ ৰাইজে নাগৰিকত্ব সংশোধনী আইন মানি নলয় , সেয়ে চৰকাৰে অনতি বিলম্বে এই আইনখন প্ৰত্যাহাৰ কৰিব লাগে ৷ অগপৰ একাংশ নেতাই নাগৰিকত্ব আইন সমৰ্থন কৰি ইয়াৰ সপক্ষে ভোটদান কৰা কাৰ্যক গৰিহণা দিয়ে মহন্তই ৷ অসম চুক্তিক অৱমাননা কৰা এই বিধেয়কখনৰ বিৰোধিতা কৰিবলৈ অগপৰ নেতাসকলক আহ্বান জনায় প্ৰফুল্ল কুমাৰ মহন্তই ৷ নাগৰিকত্ব আইন গৃহীত হোৱাৰ পাচতে অসমবাসীক শুভেচ্ছা জনোৱা প্ৰধানমন্ত্ৰী নৰেন্দ্ৰ মোডীয়ে অসমীয়াৰ ক্ষোভ সম্পৰ্কে কিমান দূৰ জ্ঞাত হৈছে সেই সম্পৰ্কে সন্দেহ আছে বুলি জানিবলৈ দিয়ে প্ৰাক্তন মুখ্যমন্ত্ৰীগৰাকীয়ে ৷
ইয়াৰ লগতে, মুখ্যমন্ত্ৰী সৰ্বানন্দ সোণোৱালক তীব্ৰ সমালোচনা কৰে প্ৰফুল্ল কুমাৰ মহন্তই ৷ উত্তৰ-পূৱৰ আন ৰাজ্যৰ মুখ্যমন্ত্ৰীসকলে নাগৰিকত্ব সংশোধনী আইনৰ বিৰুদ্ধে ঠিয় দিয়াৰ সময়তে সৰ্বানন্দ সোণোৱালে এই আইনৰ সমৰ্থন কৰাতো পৰিতাপৰ কথা বুলি উদ্বেগ প্ৰকাশ কৰে মহন্তই ৷ ইয়াৰ লগতে প্ৰাক্তন মুখ্যমন্ত্ৰীগৰাকীয়ে কয় যে, যি সকল অগপ নেতাই নাগৰিকত্ব আইনৰ সমৰ্থন জনাইছে, এসময়ত সেইসকলেই ইয়াৰ বিৰুদ্ধে অনশন কৰিছিল ৷