গুৱাহাটী,16 ডিচেম্বৰঃ সংশোধিত নাগৰিকত্ব আইন প্ৰত্যাহাৰৰ দাবীত সোমবাৰৰ পৰা আৰম্ভ হয় আছুৰ ‘গণ সত্যাগ্ৰহ’ ৷ হয়তো ‘কা’ বাতিল কৰক, নহ'লে সকলোকে গ্ৰেপ্তাৰ কৰাৰ দাবীৰে প্ৰতিবাদ সাব্যস্ত কৰে প্ৰতিবাদকাৰীসকলে ৷ কিন্তু লতাশিলৰ পৰা আৰম্ভ হোৱা উক্ত কাৰ্যসূচীৰ আৰম্ভণিতেই প্ৰতিবাদকাৰীসকলক আটক কৰে আৰক্ষীয়ে ৷ আৰক্ষীয়ে প্ৰতিবাদকাৰীসকলক দীঘলীপুখুৰী উদ্যানত আবদ্ধ কৰি ৰাখে ৷ দমনমূলক নীতিৰে চৰকাৰে অসমীয়াৰ ওপৰত ‘কা’ জাপি দিপ বিচাৰিলে পৰিস্থিতি ভয়ংকৰ হ’ব বুলি প্ৰতিবাদস্থলীৰ পৰাই পুনৰ সকিয়াই দিয়ে আছুৰ সাধাৰণ সম্পাদক লুৰিনজ্যোতি গগৈয়ে ৷
দিঘলীপুখুৰীত আছুৰ গণ সত্যাগ্ৰহ আনহাতে,জিলা উপায়ুক্তৰ কাৰ্যালয়লৈ সমদল কৰি গৈ থকা অৱস্থতে মহানগৰ আৰক্ষীয়ে আটক কৰে আছুৰ উপদেষ্টা সমুজ্বল কুমাৰ ভট্টাচাৰ্যৰ লগতে সাধাৰণ সম্পাদক লুৰিনজ্যোতি গগৈক ৷ সোমবাৰে বিয়লি 4 বজাত দুয়োকে মোকলাই দিয়াৰ কথা আছিল যদিও আটক কৰাৰ ক্ষন্তেক পিছতেই আৰক্ষীয়ে মোকলাই দিয়ে ৷ মোকলাই দিয়াৰ পিছত দীঘলীপুখুৰীৰ পাৰত উপস্থিত হৈ "আমি অহিংসা আৰু গণতান্ত্ৰিকভাৱে আন্দোলন কৰি আহিছো আমাক কোনেও বাধা দিব নোৱাৰে" বুলি মন্তব্য প্ৰকাশ কৰে দুয়োগৰাকীয়ে ৷ লগতে ‘কা’ বতিল নকৰা পৰ্যন্ত গণতান্ত্ৰিকভাৱে আন্দোলন অব্যাহত ৰখাৰ কথাও ঘোষণা কৰে ৷ উল্লেখ্য যে,মঙলবাৰে লতাশিল খেলপথাৰত পুনৰ এক বিশাল গণ সত্যাগ্ৰহৰ আয়োজন কৰা হৈছে ৷ উক্ত সত্যাগ্ৰহত সকলো ৰাইজকে অংশগ্ৰহণ কৰিবলৈ আহ্বান জনায় আছুৰ নেতা দুগৰাকীয়ে ৷
দিঘলীপুখুৰীত আবদ্ধ প্ৰতিবাদকাৰী আৰু পঢ়ক- সমুজ্জল ভট্টাচাৰ্যসহ হাজাৰ-হাজাৰ প্ৰতিবাদকাৰীক মুক্তি দিলে আৰক্ষীয়ে
