গুৱাহাটী, 21 জুলাই :অৱশেষত আৰক্ষীৰ জালত পৰিল স্বয়ম্ভূ চিকিৎসক পংকজ পাঠক(Pankaj Pathak Arrested) । বৰপেটা জিলাৰ হাউলীৰ সমীপৰ কালঝাৰৰ পৰা যোৱানিশা গ্ৰেপ্তাৰ কৰা হয় পংকজ পাঠকক(Self claimed Ayurveda expert Pankaj Pathak) ৷
জানিব পৰা মতে, বুধবাৰে দিনৰ ভাগত বৰপেটা চহৰৰ মুছলিমপট্টিৰ জনৈক মৃদুলৰ ঘৰত পংকজ পাঠকে আশ্ৰয় লৈ আছিল যদিও পিচলৈ তেওঁ কালঝাৰৰ এজন লোকৰ ঘৰত নিশাটো কটোৱাৰ পৰিকল্পনা কৰে ৷ মৃদুল নামৰ লোকজনৰ স্বীকাৰোক্তিৰ ভিত্তিত কালঝাৰত আত্মগোপন কৰি থকা পংকজ পাঠকক বুধবাৰে মাজনিশা আটক কৰে বৰপেটা আৰক্ষীয়ে ৷ বৰ্তমান হাতীগাঁও থানাত ৰখা হৈছে পংকজ পাঠকক । সংবাদমাধ্যম প্ৰৱেশ কৰিব নোৱাৰাকৈ গেট বন্ধ কৰি ৰাখিছে হাতীগাঁও আৰক্ষীয়ে(Pankaj Pathak at Hatigaon police station) ।
উল্লেখ্য যে, মহিলাৰ বিৰুদ্ধে সামাজিক মাধ্যমত অশালীন মন্তব্য কৰা সন্দৰ্ভত ৰাজ্যৰ ভিন্ন প্ৰান্তত পংকজ পাঠকৰ বিৰুদ্ধে ৰুজু হৈছিল কেইবাটাও গোচৰ ৷ উক্ত গোচৰৰ ভিত্তিত পংকজ পাঠকক গ্ৰেপ্তাৰৰ বাবে মঙলবাৰৰ পৰা নলবাৰী, টিহুকে ধৰি ভিন্ন স্থানত নলবাৰী আৰু গুৱাহাটী আৰক্ষীয়ে অভিযান চলাইছিল যদিও তেওঁৰ সন্ধান উলিয়াব পৰা নাছিল ৷ যাৰ ফলত পলাতক আছিল পংকজ পাঠক ৷