গুৱাহাটী, ২৩ নৱেম্বৰ :কৰৰ বোজাৰে জনতাক টেঁটুচেপা দিছে বিজেপি নেতৃত্বাধীন ৰাজ্য চৰকাৰে ৷ এই অভিযোগ অসমৰ বিৰোধী ৰাজনৈতিক দলসমূহৰ ৷ সেয়ে ৰাজ্য চৰকাৰে বিৰুদ্ধে জাঙুৰ খাই উঠিছে অসমৰ বিৰোধী ৰাজনৈতিক দলসমূহ । ১৫ টা ৰাজনৈতিক দলৰ বিৰোধী ঐক্য মঞ্চই চৰকাৰৰ জনগণ বিৰোধী, অগণতান্ত্ৰিক, হঠকাৰী সিদ্ধান্ত কোনো কাৰণতে মানি নোলোৱাৰ হুংকাৰেৰে গুৱাহাটীৰ লক্ষীধৰ বৰা ক্ষেত্ৰত বৃহস্পতিবাৰে এক প্ৰতিবাদী কাৰ্যসূচী ৰূপায়ণ কৰে ।
প্ৰতিবাদী কাৰ্যসূচীত অজাপৰ সভাপতি লুৰীণজ্যোতি গগৈ, সাংসদ অজিত কুমাৰ ভূঞা, কংগ্ৰেছৰ বিধায়ক কমলাক্ষ্য দে পুৰকায়স্থ, চি পি আই এমৰ নেতা হেমেন দাস, উদ্ধৱ বৰ্মন, সুপ্ৰকাশ তালুকদাৰ, অসম প্ৰদেশ কংগ্ৰেছৰ সাধাৰণ সম্পাদক অপূৰ্ব কুমাৰ ভট্টাচাৰ্যৰ লগতে আপ আৰু অসম তৃণমূল কংগ্ৰেছৰ কেবাগৰাকী নেতা উপস্থিত আছিল ।
কাৰ্যসূচীত অংশ লৈ প্ৰতিবাদকাৰীসকলে বিজেপি চৰকাৰ হায় হায়, মুখ্যমন্ত্ৰী হিমন্ত বিশ্ব শৰ্মা মুৰ্দাবাদ আদি ধ্বনি দি পৰিৱেশ উত্তাল কৰি তোলে । এই প্ৰতিবাদী কাৰ্যসূচীত অংশ লৈ বিৰোধী ঐক্য মঞ্চৰ হৈ মন্তব্য দি অজাপৰ সভাপতি লুৰীণজ্যোতি গগৈয়ে জনসাধাৰণৰ ওপৰত জধেমধে কৰ আৰোপ কৰা কাৰ্যক অতি আচৰিত আৰু ভয়াবহ কথা বুলি উল্লেখ কৰে ।
চৰকাৰখনৰ চৰিত্ৰ ব্ৰিটিছ ইষ্ট ইণ্ডিয়া কোম্পানীতকৈ ভয়ংকৰ আৰু ভয়াৱহ বুলি উল্লেখ কৰি মুখ্যমন্ত্ৰী ড৹ হিমন্ত বিশ্ব শৰ্মাক অসমৰ ইতিহাসৰ আটাইতকৈ নিষ্কর্মা মুখ্যমন্ত্ৰীৰূপে তেওঁ অভিহিত কৰে । মুখ্যমন্ত্ৰীয়ে জাতি-জনগোষ্ঠীৰ অসমৰ কৃষ্টি সংস্কৃতিৰ মেটমৰা ব্যৱস্থাক বিৰোধিতা কৰা বুলি অভিযোগ তুলি লুৰীণজ্যোতি গগৈয়ে কয় যে মুখ্যমন্ত্ৰী ড৹ হিমন্ত বিশ্ব শৰ্মা অসমীয়া সংস্কৃতিৰ শত্ৰু ।