গুৱাহাটী, ১৮ ডিচেম্বৰ :অসম-মণিপুৰ সীমান্তৰ কাছাৰ জিলাৰ নামদাইলং পুঞ্জীত গুলীচালনাৰ ঘটনাত জড়িত তিনি নাগা নেশ্যনেল কাউঞ্চিল (NNC)ৰ সদস্য়ক গ্ৰেপ্তাৰ । ধৃত তিনি কেডাৰ হৈছে পুনিং ৰংমাই, দিতিউওয়াং ৰংমাই আৰু নামজাওৰেই গাংমেই ৷ ধৃত তিনি উগ্ৰপন্থী কেডাৰৰ ঘৰ সীমান্তৰ কাছাৰৰ নামদাইলং অঞ্চলত । যোৱানিশা সীমান্তৰ নামদাইলং অঞ্চলত কাছাৰ আৰক্ষী আৰু অসম ৰাইফলছে যুটীয়া অভিযান চলাই নাগা নেশ্যনেল কাউঞ্চিলৰ তিলি সদস্যক গ্ৰেপ্তাৰ কৰিবলৈ সক্ষম হয় ।
উল্লেখ্য় যে যোৱা ১২ ডিচেম্বৰত অসম-মণিপুৰ সীমান্তৰ কাছাৰৰ নামদাইলং পুঞ্জীত এক হত্যাকাণ্ড সংঘটিত হয় । নাগা নেশ্যনেল কাউঞ্চিল নামৰ উগ্ৰপন্থী সংগঠনটোৰ এক সভাত গাইদেন চোংপো ৰংমাই নামৰ এজন সতীৰ্থক গুলীয়াই হত্যা কৰিছিল সংগঠনটোৰ আন এজন সদস্যই । এই ঘটনাৰ পাছত সীমান্ত অঞ্চলত আৰক্ষীয়ে তীব্ৰ অভিযান আৰম্ভ কৰে । এই অভিযান কালত আৰক্ষীয়ে নাগা নেশ্যনেল কাউঞ্চিলৰ তিনি কেডাৰক গ্ৰেপ্তাৰ কৰিবলৈ সক্ষম হয় । ধৃত তিনি কেডাৰে সতীৰ্থক গুলীয়াই হত্যা কৰিছে বুলি আৰক্ষীয়ে সন্দেহ প্ৰকাশ কৰিছে । ইতিমধ্যে তিনি কেডাৰক আৰক্ষীয়ে ১০ দিনৰ ন্যায়িক জিম্মাত লৈ তদন্ত আৰম্ভ কৰা বুলি কয় কাছাৰৰ আৰক্ষী অধীক্ষক নোমাল মাহাত্তাই ।