গুৱাহাটী,29 অক্টোবৰঃ দুৰ্দান্ত অভিনয়ৰ জৰিয়তে সকলোৰে মন জয় কৰা নিপন গোস্বামী এতিয়া অকলশৰীয়া ৷ কিছুদিন পূৰ্বে স্বাস্থ্যৰ অৱনতি ঘটাৰ পিছতে জি এন আৰ চিত ভৰ্তি কৰাব লগা হৈছিল নিপন গোস্বামীক । তাৰ পিছতেই কিছু উপশম পোৱাত ঘৰলৈ লৈ অনা হয় যদিও সম্পূৰ্ণ আৰোগ্য নোহোৱাৰ বাবে বর্তমান বিচনাখনকেই সংগী হিচাপে মানি লৈছে তেওঁ ।
তেওঁ জনাই যে, চৰকাৰে তেখেতৰ প্ৰতি দেখুৱা অনীহাই তেখেতক মনোকষ্ট দিছে । চৰকাৰী সাহাৰ্য নোপোৱাৰ বেজাৰো ব্যক্তি কৰিছে অভিনেতাগৰাকীয়ে ৷ এইখন চৰকাৰৰ বহু ৰাজনীতিবিদ তেখেতৰ বন্ধু যদিও কোনো এজনো বন্ধুৱে খবৰ লবলৈ নাহিল তেওঁৰ । সেই কথাই যথেষ্ট মনোকষ্ট দিছে নিপন গোস্বামীক । শিল্পীয়ে কষ্টৰ বিনিময়ত যি পাৰিশ্ৰমিক পায় সেই পাৰিশ্ৰমিক ভৱিষ্যৎ জীৱনৰ ঘাত-প্ৰতিঘাতত মোকাবিলা কৰিব পৰাকৈ যথেষ্ট নহয় বুলিও তেওঁ ব্যক্ত কৰে । ই টি ভি ভাৰতৰ তৰফৰ পৰা অভিনেতাগৰাকীৰ আশু আৰোগ্য কামনা কৰাৰ লগতে তেওঁৰ আধৰুৱা হৈ থকা ছবিৰ কাম পূৰ্ণ কৰিব পৰাকৈ মনোবল অহাৰ কামনা কৰিলোঁ ৷