বিপাঙত পৰিছে ৰাজ্যৰ গৃহ বিভাগ!

জিলা ভিত্তিক তথ্যই নাই: নতুন ন্যায়াধীকৰণ স্থাপন কৰিবলৈ গৈ বিমোৰত ৰাজ্যৰ গৃহ বিভাগ ৷

গুৱাহাটী,13 চেপ্তেম্বৰঃৰাষ্ট্ৰীয় নাগৰিকপঞ্জীৰ চূড়ান্ত তালিকা প্ৰকাশ পোৱাৰ পিছত এতিয়া দুশখন নতুন বিদেশী ন্যায়াধীকৰণ স্থাপন কৰিবলৈ গৈ বিমোৰত পৰিছে ৰাজ্যৰ গৃহ বিভাগ । কিয়নো,ৰাষ্ট্ৰীয় নাগৰিকপঞ্জীৰ পৰা ১৯ লাখ ৬ হাজাৰ ৬৫৭ জন লোকৰ নাম বাদ পৰিল যদিও এইসকল লোকৰ জিলাভিত্তিক তালিকা এতিয়াও ৰাষ্ট্ৰীয় নাগৰিকপঞ্জী কৰ্তৃপক্ষই যোগান ধৰা নাই ৰাজ্যৰ গৃহ বিভাগক । ফলত কোনখন জিলাত কিমান সংখ্যক লোকৰ নাম বাদ পৰিল আৰু তেনে সংখ্যাৰ ফালৰ পৰা কোনখন জিলাত কিমানখন ন্যায়াধীকৰণৰ প্ৰয়োজন হ'ব সেই কথা এতিয়াও ঠাৱৰ কৰিব পৰা নাই গৃহ বিভাগে ৷

শীঘ্ৰেই যদি ৰাষ্ট্ৰীয় নাগৰিকপঞ্জী কৰ্তৃপক্ষই এই তথ্য গৃহ বিভাগক নজনাই তেন্তে গৃহ বিভাগে ন্যায়ালয়ৰ কাষ চপাৰ সম্ভাৱনা আছে ৷ কিয়নো ইতিমধ্যেই নতুন দুশখন বিদেশী ন্যায়াধীকৰণৰ বাবে সদস্য,কৰ্মচাৰীকে ধৰি বহুসংখ্যক লোকক নিযুক্তিও দিয়া হৈছে। নাম বাদ পৰা সকলে ১২০ দিনৰ ভিতৰত বিদেশী ন্যায়াধীকৰণত আবেদন জনাব পাৰিব বুলি ঘোষণা কৰাৰ পিছত এপষেক হ'ল যদিও আবেদন জনাবলৈ পৰ্যাপ্ত ন্যায়াধীকৰণ নাই। সেইসকল লোকে ক'ত আবেদন জনাব । তাক লৈ চিন্তিত হৈ পৰিছে ৷