গুৱাহাটী,27 জানুৱাৰী:সোমবাৰে কেন্দ্ৰীয় চৰকাৰৰ বড়ো চুক্তিকলৈ গুৱাহাটী প্ৰেছ ক্লাৱত সাংসদ নৱ শৰণীয়াৰ সংবাদমেল । সংবাদমেলত এই চুক্তি তথা UTCক বিৰোধিতা কৰি সাংসদগৰাকীয়ে কয়, সংখ্যাগৰিষ্ঠ অবড়ো ৰাইজক উপহাস কৰি কেৱল বড়োসকলক বহুৱাই এই চুক্তি স্বাক্ষৰ কৰিলে কোনো কাৰণতে গ্ৰহণযোগ্য নহ'ব । চৰকাৰৰ এই ৰাজনৈতিক লাভালাভৰ বাবে এই কাৰ্য সম্পাদন কৰিছে । এই সন্দৰ্ভত সাংসদ গৰাকীয়ে কয় যে, ২০০৮ৰ ধাৰাবাহিক বোমা বিস্ফোৰণৰ মূল খলনায়ক ৰঞ্জন দৈমাৰীক আগস্থানত বহুৱাই এই চুক্তি স্বাক্ষৰ কৰি চৰকাৰে উগ্ৰপন্থী সংগঠনক উৎসাহিত কৰাৰ লগতে সশস্ত্ৰ বাহিনীৰ প্ৰতি মানুহক আকৰ্ষিত কৰিছে । বিজেপি চৰকাৰৰ যদিহে ৰাইজৰ সমস্যা সমাধানৰ প্ৰতি সদিচ্ছা আছে তেন্তে বিটিচিৰ সকলো লোককে কিয় আলোচনাৰ মেজলৈ নামাতিলে । ইয়াৰ জৰিয়তে চৰকাৰ আৰু বিটিচি প্ৰধান হাগ্ৰামা মহিলাৰীয়ে বুজাই দিছে যে এন ডি এফ বিৰ কান্ধত বন্দুক থৈ তেওঁলোকৰ ৰাজনৈতিক মুনাফা লভিবলৈ চেষ্টা চলাইছে ।
ইফালে এই সংবাদমেলত উপস্থিত অবড়ো সুৰক্ষা সমিতিৰ নেতাসকলেও এই চুক্তিৰ বিৰোধিতা কৰাৰ লগতে বিজেপি চৰকাৰ আৰু বিটিচি প্ৰধান হাগ্ৰামা মহিলাৰীক তীব্ৰ ভাষাৰে সমালোচনা কৰে । হাগ্ৰামাই বিটিচিৰ পৰা উৎখাত হোৱাৰ ভয়তে জংঘলৰ পৰা মাটি আনি এন ডি এফ বিৰ হতুৱাই চুক্তি কৰিছে । নাগৰিকত্ব সংশোধনী আইন আনি যিদৰে ভাৰতীয় সংবিধানক বিজেপিয়ে ভৰিৰে মোহাৰিছে, ঠিক তেনেদৰে UTC তথা বড়ো চুক্তি স্বাক্ষৰ কৰিও সংবিধানক সম্পূৰ্ণৰূপে অৱমাননা কৰিব বিচাৰিছে । কেৱল এটা জনগোষ্ঠীক কেন্দ্ৰ কৰি স্বাক্ষৰিত এই চুক্তিক কোনো কাৰণতে মানি লোৱা নহ'ব বুলিও স্পষ্ট কৰি দিয়ে অবড়ো সুৰক্ষা সমিতিয়ে । তাৰোপৰি বিটিচিৰ আগন্তুক নিৰ্বাচনত হাগ্ৰামা বাহিনীক পুলিয়ে-পোখায়ে উৎখাত কৰিবলৈ সাজু বুলিও উল্লেখ কৰে সমিতিয়ে ।