গুৱাহাটী, 13 নৱেম্বৰঃ " মুখ্যমন্ত্ৰী সৰ্বানন্দ সোণোৱালে ধৃতৰাষ্ট্ৰৰ ভূমিকা পালন কৰিছে নহ'লে হিতেশ দেৱ শৰ্মাৰ দৰে এজন বিষয়াক এন আৰ চিৰ সমন্বয়ক হিচাপে নিযুক্তি নিদিলেহেঁতেন ৷" বুধবাৰে বৰপেটাৰ সাংসদ আব্দুল খালেকে সংবাদ মেল সম্বোধন কৰি হিতেশ দেৱ শৰ্মাক এন আৰ চিৰ নতুন মুখ্য সমন্বয়ক হিচাপে নিযুক্তি দিয়াৰ বিৰোধিতা কৰি ৰাজ্য চৰকাৰক তীব্ৰ সমালোচনা কৰে ৷ বৰ্তমানৰ বিজেপি চৰকাৰখন এখন ব্যৰ্থ চৰকাৰ বুলি প্ৰতীক হাজেলাৰ বদলিয়ে প্ৰমাণ কৰিছে বুলিও ৰাজ্য চৰকাৰক তীব্ৰ সমালোচনা কৰে খালেকে । ৰাজ্য চৰকাৰে হাজেলাৰ বদলিৰ পৰিৱৰ্তে নিৰাপত্তাৰ ব্যৱস্থাহে কৰিব লাগিছিল বুলি মন্তব্য প্ৰকাশ কৰে সাংসদ গৰাকীয়ে ৷
সাংসদ আব্দুল খালেকৰ সংবাদমেল সংবাদমেলত সাংসদ গৰাকীয়ে আৰু কয় যে, প্ৰতীক হাজেলাই এন আৰ চিৰ কাম যথেষ্ট আগবঢ়াই নিছিল ৷ কিন্তু শেহতীয়াকৈ ৰাজ্য চৰকাৰে প্ৰতীক হাজেলাৰ উত্তৰসুৰী হিচাপে যি গৰাকী বিষয়া নিযুক্তি দিছে তাৰ পৰা জানিব পাৰি যে এখন শুদ্ধ এন আৰ চি হোৱাতো ৰাজ্য চৰকাৰে নিবিচাৰে । ইমানেই নহয়, ৰাজ্য চৰকাৰে নিযুক্তি দিয়া বিষয়াজনে এন আৰ চিৰ বিৰুদ্ধে বহুতো বিতৰ্কিত আৰু আপত্তিজনক ফেচবুক পোষ্ট দিয়াৰ তথ্য আছে বুলিও অভিযোগ উত্থাপন কৰে সাংসদগৰাকীয়ে ।
লগতে এজন চৰকাৰী বিষয়াই ৰাজনৈতিক দলক ৰাজহুৱাভাৱে সমৰ্থন কৰি ফেচবুক পোষ্ট দিব পাৰে নেকি বুলিও প্ৰশ্ন কৰে বৰপেটাৰ সাংসদ গৰাকীয়ে ৷ ইয়াৰোপৰি ৰাষ্ট্ৰীয় পৰ্যায়ৰ এজন বিৰ্তকিত সাংবাদিকক সমৰ্থন কৰি হিতেশ দেৱ শৰ্মাই পোষ্ট দিয়া কাৰ্যক তীব্ৰ সমালোচনা কৰে ৷ উল্লেখ্য যে, সাংসদ গৰাকীয়ে মুখ্যমন্ত্ৰীৰ কাৰ্যালয়লৈ গৈ মুখ্যমন্ত্ৰীক পত্ৰ প্ৰদান কৰি হিতেশ দেৱ শৰ্মাক এন আৰ চিৰ মুখ্য সমন্বয়ক হিচাপে নিযুক্তি প্ৰদান নকৰিবলৈ দাবী জনাইছে বুলি জানিবলৈ দিছে । চিঠি খনত ৰাজ্যৰ শান্তি সম্প্ৰীতি অটুট ৰাখিবলৈ আৰু শুদ্ধ এন আৰ চিৰ স্বাৰ্থত হিতেশ দেৱ শৰ্মাৰ নিযুক্তি বাতিল কৰিবলৈ উল্লেখ কৰিছে বুলি মন্তব্য কৰে ৷ এই ক্ষেত্ৰত মুখ্যমন্ত্ৰীয়ে উপযুক্ত ব্যৱস্থা গ্ৰহণ কৰিব বুলিও আশাবাদী সাংসদ গৰাকী ৷
