গুৱাহাটী, ৮ অক্টোবৰ :এতিয়াও তল পৰা নাই শ্ৰীমন্ত শংকৰদেৱ সংঘৰ অনুষ্ঠানত সাংসদ বদৰুদ্দিন আজমলৰ অংশগ্ৰহণ বিতৰ্ক ৷ এইবাৰ শংকৰ সংঘত আজমল প্ৰসংগত সৰৱ হৈ পৰিছে দিছপুৰৰ বিজেপিৰ বিধায়ক অতুল বৰা ৷ শংকৰ সংঘক সমালোচনা কৰি বিধায়ক অতুল বৰাই কয়, “ভৰি ধোৱা পানী খাব লাগিব বুলি ক’লেহে, কামত নামি গ'ল ।”
এক বিবৃতি যোগে বুধবাৰে বিধায়কজনে কয়, “শংকৰ সংঘৰ বিধান মতেই মোৰ বিয়াখন হৈছিল । সোণাৰাম চুতীয়াৰ নেতৃত্বত ৷ এগৰাকী নমস্য ব্যক্তি । শংকৰ সংঘৰ গুৰি ধৰোঁতা । আমি 'বামুণীয়া’- দেউতাই আপত্তি কৰা নাছিল ৷ যদিও ঘৰলৈ আনি হোম পোৰাৰ কথা এবাৰ কৈছিল- হেঁচা নিদিলে । হিন্দুৱে মুছলমানৰ ভৰি ধোৱা পানী খাব লাগিব বুলি ক'বলৈহে পালে, ভৰি ধোৱা আৰম্ভ হৈ গ'ল ।”
উল্লেখ্য যে কেইদিনমানৰ পূৰ্বে এআইইউডিএফৰ সভাপতি সাংসদ বদৰুদ্দিন আজমলে বৰপেটাৰ মন্দিয়াত এখন দলীয় সভাত অংশগ্ৰহণ কৰি মুখ্যমন্ত্ৰী হিমন্ত বিশ্ব শৰ্মাক উদ্দেশ্যি কৈছিল, ‘‘ যদি ভাৰতত শাসন কৰিব বিচাৰা তেন্তে মুছলমানৰ হাত-ভৰি ধুই পানী খাব লাগিব ৷’’ এই মন্তব্য কৰাৰ পাচতেই ৪ নৱেম্বৰত গোৱালপাৰাৰ ধূপধৰাত শ্ৰীমন্ত শংকৰদেৱ সংঘৰ এক অনুষ্ঠানত ভাগ লয় আজমলে ৷ ইয়াকে লৈ ৰাজ্যৰ একাংশই, বিশেষকৈ বিজেপিৰ নেতাই বিষয়টো বিতৰ্কৰ মাজলৈ আনে ৷
বুধবাৰে এই বিতৰ্কত জপিয়াই পৰিল বিভিন্ন মন্তব্যৰে প্ৰায়ে চৰ্চাৰ মাজত থকা বিজেপি বিধায়ক অতুল বৰা ৷ এখন মুকলি পত্ৰত সংঘক সমালোচনা কৰিছে অতুল বৰাই ৷ নিজৰ বিধায়কৰ পেডত অতুল বৰাই শ্ৰীমন্ত শংকৰদেৱ সংঘৰ প্ৰতি লগতে কৈছে- “ আজমলৰ চৰণ চুই সেৱা জনোৱা দৃশ্য টিভিত দেখা পাই কোনোবা অসমীয়াই যদি শান্তি পাইছে, সেই কথা নাজানো ৷ আমাৰ কিন্তু সহ্য হোৱা নাই ।’’