প্ৰফুল্ল কুমাৰ মহন্তক সাক্ষাৎ সৰ্বানন্দ সোণোৱালৰ গুৱাহাটী, 19 মে’: আধাঘণ্টা ধৰি আলোচনাত মিলিত হ’ল অসমৰ দুগৰাকী প্ৰাক্তন মুখ্যমন্ত্ৰী ৷ এগৰাকী অসমৰ দুবাৰৰ মুখ্যমন্ত্ৰী তথা এসময়ত অসমৰ ৰাইজে তেওঁ যোৱা বাটত গামোছা পাৰি দিছিল ৷ অসমৰ ইতিহাসৰ কেইবাটাও দশকৰ উত্থান-পতনৰ সৈতে জড়িত তেওঁ ৷ স্বাস্থ্যগত কাৰণত বৰ্তমান তেওঁ জিৰণিত ৷ এইজনেই হৈছে অসমৰ প্ৰাক্তন মুখ্যমন্ত্ৰী প্ৰফুল্ল কুমাৰ মহন্ত (Ex CM Prafulla Kumar Mahanta) ৷
শুকুৰবাৰে প্ৰফুল্ল কুমাৰ মহন্তক সাক্ষাৎ কৰি স্বাস্থ্যৰ বুজ ল’লে অসমৰ প্ৰাক্তন মুখ্যমন্ত্ৰী তথা বৰ্তমানৰ কেন্দ্ৰীয় মন্ত্ৰী সৰ্বানন্দ সোণোৱালে ৷ প্ৰাক্তন মুখ্যমন্ত্ৰী প্ৰফুল্ল কুমাৰ মহন্তক আজি গুৱাহাটীস্থিত দিশপুৰৰ বাসগৃহত সাক্ষাৎ কৰে কেন্দ্ৰীয় মন্ত্ৰী সৰ্বানন্দ সোণোৱালে (Minister Sarbananda Sonowal) ৷
কেন্দ্ৰীয় মন্ত্ৰী সোণোৱালে প্ৰফুল্ল কুমাৰ মহন্তৰ খবৰ তথা স্বাস্থ্যৰ বুজ লৈ প্ৰায় আধাঘণ্টা সময় মত-বিনিময় কৰে ৷ দুবাৰকৈ মুখ্যমন্ত্ৰীৰ পদত অধিষ্ঠিত প্ৰাক্তন মুখ্যমন্ত্ৰীজনৰ সুস্বাস্থ্যৰ লগতে দীৰ্ঘ জীৱন কামনা কৰে কেন্দ্ৰীয় মন্ত্ৰীগৰাকীয়ে ৷ লগতে প্ৰফুল্ল কুমাৰ মহন্তৰ সহধৰ্মিণী, লেখিকা ড৹ জয়শ্ৰী গোস্বামী মহন্ত আৰু পৰিয়ালৰ আন সদস্যসকলৰ সৈতেও বাৰ্তালাপত মিলিত হয় কেন্দ্ৰীয় মন্ত্ৰী সৰ্বানন্দ সোণোৱাল (Sarbananda Sonowal Meets Prafulla Kumar Mahanta) ৷
ড৹ জয়শ্ৰী গোস্বামী মহন্তই সৰ্বানন্দ সোণোৱালক উপহাৰ হিচাবে আগবঢ়ায় স্বৰচিত কেইবাখনো গ্ৰন্থ ৷ মহন্তৰ সৈতে বাৰ্তালাপৰ পিছত সোণোৱালে সাংবাদিকৰ আগত কয়, ‘‘প্ৰফুল্ল কুমাৰ মহন্ত কিছুদিন ধৰি অসুস্থ হৈ আছে ৷ তেখেতৰ স্বাস্থ্যৰ বুজ ল’বলৈ আহিছিলো ৷ তেখেত সুস্থ হৈ উঠক পৰিয়ালৰ সৈতে সুখেৰে থাকক তাকেই কামনা কৰিলো’’ বুলি মন্তব্য কৰে কেন্দ্ৰীয় মন্ত্ৰী সোণোৱালে ৷ সৰ্বানন্দ সোণোৱালৰ সৈতে প্ৰফুল্ল কুমাৰ মহন্তৰ স্বাস্থ্যৰ বুজ লয় বিধায়ক পোনাকণ বৰুৱাকে ধৰি দুই বিজেপি নেতা ঋতুপৰ্ণ বৰুৱা আৰু সুভাষ দত্তই (Former Assam CM Prafulla Kumar Mahanta) ৷
লগতে পঢ়ক:State Convention on Human Rights 2023 : ২১ মে'ত গুৱাহাটীত মানৱ অধিকাৰ ৰাজ্যিক সন্মিলন 2023
