গুৱাহাটী,11 জুন : মাইক্ৰ’ ফাইনেন্স ঋণ (micro finance loan) সন্দৰ্ভত শুকুৰবাৰে জনতা ভৱনত সংবাদমেল সম্বোধন কৰে মন্ত্ৰী অশোক সিংঘাল (Ashok Singhal)য়ে ৷ সংবাদমেলযোগে কোনে কোনে মাইক্ৰ’ ফাইনেন্সৰ ঋণত ৰেহাই লাভ কৰিব, সেই সন্দৰ্ভত মন্তব্য আগবঢ়ায় মন্ত্ৰীগৰাকীয়ে ৷ মুখ্যমন্ত্ৰী ড৹ হিমন্ত বিশ্ব শৰ্মা(himanta biswa sarma)ই প্ৰথম কেবিনেটতে মাইক্ৰ’ ফাইনেঞ্চ ঋণক লৈ সমিতি গঠন কৰি দিয়া বুলি মন্তব্য কৰি মন্ত্ৰী অশোক সিংঘালে কয় যে, সমিতি গঠনৰ পাচত 3 বাৰ ভিডিঅ’ কনফাৰেঞ্চৰ জৰিয়তে অংশীদাৰীসকলৰ (stakeholder) সৈতে ঋণ সম্পৰ্কে আলোচনা কৰা হৈছিল ৷
মন্ত্ৰীগৰাকীয়ে কয় যে, বৰ্তমান এই ঋণত 40 জন লেণ্ডাৰ, 24 লাখ গ্ৰাহক, 45 লাখ বেংক একাউন্ট, 12,500 কোটি ঋণ আৰু সুদ আছে ৷ 2020 চনৰ 31 ডিচেম্বৰৰ পূৰ্বে ঋণ লোৱাসকলেহে মুখ্যমন্ত্ৰীয়ে গঠন কৰা সমিতিৰ আওঁতালৈ আহিব ৷ যদি কোনো ঋণৰ এনপিএ (NPA) হৈ গৈছে, তেন্তে তেনে ঋণ লোৱাসকল সমিতিৰ আওঁতালৈ নাহিব ৷ কোনো পৰিয়ালৰ বছৰি আয় এক লাখৰ ওপৰত হ’লে তেওঁলোকো আওঁতালৈ নাহিব ৷ টেক্স, চাৰিচকীয়া বাহন থকাসকল ইয়াৰ বাহিৰত থাকিব ৷ কেৱল দুখীয়াসকল সন্মানেৰে জীয়াই থাকিবলৈহে মুখ্যমন্ত্ৰীয়ে এই ব্যৱস্থা লৈছে বুলি মন্ত্ৰী অশোক সিংঘালে সদৰি কৰে ৷