নতুন ৰাষ্ট্ৰীয় শিক্ষা নীতিয়ে শিক্ষাৰ ক্ষেত্ৰ খনত সমস্যাৰ সৃষ্টি কৰিব !

নতুন শিক্ষা নীতিয়ে প্ৰাক প্ৰাথমিক স্তৰ পুনৰ আৰম্ভ কৰিব খুজিছে কিন্তু সেয়া কৰ্মক্ষেত্ৰত কিমানদূৰ সফল হ'ব সেয়া এতিয়াই অনুমান কৰিব নোৱাৰি । এই প্ৰস্তাৱ যদি কাৰ্যকৰী হয় তেতিয়া ভাৰতবৰ্ষত মাতৃ ভাষা শিক্ষা মাধ্যমৰ যে কিবা পৰিৱৰ্তন বা বিকাশ হব' সেইটো এই খচৰাৰ জৰিয়তে প্ৰকাশিত হোৱা নাই।

গুৱাহাটী, ১৩ জুলাই:নতুন ৰাষ্ট্ৰীয় শিক্ষা নীতিয়ে শিক্ষাৰ ক্ষেত্ৰ খনত সমস্যাৰ সৃষ্টি কৰাৰ আশংকা কৰি শনিবাৰে অসমৰ ছাত্ৰ সংগঠন সমূহে বিভিন্ন শিক্ষাবিদৰ স'তে এক আলোচনাত মিলিত হয় । ছাত্ৰ মুক্তি সংগ্ৰাম সমিতি অসমৰ উদ্যোগত সাহিত্য সভা ভৱনত এই আলোচনাচক্ৰ অনুষ্ঠিত হয় ।

এই আলোচনাচক্ৰত ৰাষ্ট্ৰীয় শিক্ষা নীতি কি, এই শিক্ষা নীতিয়ে প্ৰকৃততে কাক লাভৱান কৰিব তাৰ ওপৰত বিশদভাৱে আলোচনা কৰা হয় । আলোচনাচক্ৰ খনত আলোচক হিচাবে উপস্থিত থাকে দীনেশ বৈশ্য, অধ্যাপক দিলীপ বৰা, জয়দ্বীপ বৰাকে প্ৰমুখ্য কৰি বহু কেইজন শিক্ষাবিদ । তেওঁ লোকে কয় যে নতুন শিক্ষা নীতিয়ে প্ৰাক্ প্ৰাথমিক স্তৰ পুনৰ আৰম্ভ কৰিব খুজিছে কিন্তু সেয়া কৰ্মক্ষেত্ৰত কিমানদূৰ সফল হ'ব সেয়া এতিয়াই অনুমান কৰিব নোৱাৰি । নতুন শিক্ষা নীতিত উল্লেখিত "গৱেষণা বিশ্ববিদ্যালয়"ধাৰণাটোৱে দেশৰ এচাম বৃহৎ পুঁজিপতিকহে সুবিধা প্ৰদান কৰিব । এই খচৰাত এখন গৱেষণা বিশ্ববিদ্যালয় হ'বলৈ নূন্যতম 5 হাজাৰৰ পৰা 25 হাজাৰ ছাত্ৰ-ছাত্ৰী থাকিব লাগিব বুলি উল্লেখ কৰা আছে । ইমান বৃহৎ আকাৰৰ বিশ্ববিদ্যালয় কোনো ব্যক্তি বা ৰাজ্য চৰকাৰ সমূহে স্থাপন কৰাটো সম্ভৱ নহয় । গতিকে নতুন শিক্ষা নীতিয়ে উচ্চ শিক্ষাক বৃহৎ পুঁজিপতিৰ মুনাফা লাভৰ এক ব্যৱসায়লৈ পৰিণত কৰিব বুলি তেওঁলোকে মতপোষণ কৰে । লগতে কয় যে এই প্ৰস্তাৱ যদি কাৰ্যকৰী হয় তেতিয়া ভাৰতবৰ্ষত মাতৃভাষা শিক্ষা মাধ্যমৰ যে কিবা পৰিৱৰ্তন বা বিকাশ হ’ব সেইটো এই খচৰাৰ জৰিয়তে প্ৰকাশিত হোৱা নাই । ইয়াৰোপৰি তেওঁলোকে এই শিক্ষা নীতিৰ বিৰুদ্ধে ছাত্ৰ মুক্তি সংগ্ৰাম সমিতিক ৰাজ্যত আন্দোলন গঢ়ি তোলাৰো আহ্বান জনায় ।