কিয় আৰু কি পৰিস্থিতিত আৰক্ষীয়ে গুলীয়ালে ধৰ্ষণকাৰী বিকি আলীক ?

শেহতীয়াকৈ গুৱাহাটীত সংঘটিত হৈছিল এক ধৰ্ষণ কাণ্ড । ৫ যুৱকে দলবদ্ধবাৱে ধৰ্ষণ কৰিছিল এগৰাকী কিশোৰীক । ধৰ্ষণকাণ্ডৰ মূল অভিযুক্ত ইতিমধ্যে আৰক্ষীৰ এনকাউণ্টাৰত নিহত হৈছে (Main accused of Garigaon rape case dies)। কিন্তু কি পৰিস্থিতিত আৰক্ষীয়ে গুলীয়ালে অভিযুক্ত বিকি আলীক ?

গুৱাহাটী,১৬ মাৰ্চ : গুৱাহাটীৰ গাড়ীগাঁৱৰ দলবদ্ধ ধৰ্ষণকাণ্ডৰ মূল অভিযুক্ত বিকি আলীৰ আৰক্ষীৰ এনকাউণ্টাৰত মৃত্যু হয় (Rapist Vicky Ali dies in Police encounter)। ১৬ বছৰীয়া কিশোৰীক ধৰ্ষণ কৰি আৰক্ষীৰ জালত পৰিছিল বিকি আলী । কিন্তু আৰক্ষীৰ ছাৰ্ভিচ ৰিভ'লভাৰ কাঢ়ি পলোৱাৰ চেষ্টা কৰোতেই আৰক্ষীয়ে বিকিক লক্ষ্য কৰি গুলীচালনা কৰে (Police encounter in Guwahati)। এনকাউণ্টাৰ সম্পৰ্কে সংবাদমাধ্যমৰ সন্মুখত মন্তব্য আগবঢ়াই উপ-আৰক্ষী আয়ুক্ত (DCP) নৱনীত মহন্তই ।

গড়চুক আৰক্ষী থানাত সংবাদমেল সম্বোধন কৰি উপ-আৰক্ষী আয়ুক্তগৰাকীয়ে কয় যে ধৰ্ষণৰ বাকী কেইটা অভিযুক্তৰ সন্ধানত আৰক্ষীয়ে বিকিক লগত লৈ অভিযান চলাইছিল । অভিযানৰ সময়তে অসম-মেঘালয় সীমান্তৱৰ্তী গড়ভঙা বনাঞ্চলত পানবজাৰ মহিলা আৰক্ষী থানাৰ ভাৰপ্ৰাপ্ত আৰক্ষী বিষয়া টুইংকল গোস্বামীৰ ছাৰ্ভিচ ৰিভ'লভাৰ কাঢ়ি পলোৱাৰ চেষ্টা কৰিছিল বিকিয়ে । আৰক্ষীলৈ লক্ষ্য কৰি দুই জাই গুলিও ফুটাইছিল বিকিয়ে ।

আত্মৰক্ষাৰ বাবে আৰক্ষীয়ে বিকিক লক্ষ্য কৰি গুলীচালনা কৰিবলৈ বাধ্য হয় । এই গুলীচালনাত নিহত হয় বিকি আলী (Main accused of Garigaon rape case dies)।

আনহাতে বিকিৰ গুলীচালনাত আহত হয় দুই আৰক্ষী বিষয়া । সম্প্ৰতি GMCHত চিকিৎসাধীন হৈ আছে আহত ভাৰপ্ৰাপ্ত আৰক্ষী বিষয়া টুইংকল গোস্বামী । আৰক্ষীয়ে জনোৱা মতে বাকী চাৰি অভিযুক্তক বিচাৰি আৰক্ষীৰ তদন্ত অব্যাহত আছে ।

উল্লেখ্য যে ১৬ বছৰীয়া কিশোৰীক চাৰি বন্ধুৰ সৈতে দলবদ্ধ ধর্ষণ কৰিছিল বিকিয়ে । যোৱা ৮ মার্চত ভুক্তভোগী কিশোৰীগৰাকীৰ পৰিয়ালে পানবজাৰ মহিলা আৰক্ষী থানাত এক এজাহাৰ দাখিল কৰিছিল ।এজাহাৰৰ ভিত্তিত ১৯/২২ নম্বৰত এক গোচৰো ৰুজু কৰা হৈছিল । গোচৰ ৰুজু হোৱাৰ ৬ দিনৰ পাছত আৰক্ষীৰ জালত পৰিছিল ধৃত বিকি । আনহাতে বাকী চাৰি অভিযুক্ত ধৰ্ষণকাৰী বর্তমানো পলাতক ।

লগতে পঢ়ক :এনকাউণ্টাৰত মৃত্যু গাড়ীগাঁও দলবদ্ধ ধৰ্ষণ কাণ্ডৰ মূল অভিযুক্ত বিকি আলীৰ