জুবিন গাৰ্গৰ স্বাস্থ্যৰ বুজ ললে ৰিপুন বৰা, লুৰিণ আৰু দীপাংকই

দেওবাৰে শিল্পী জুবিন গাৰ্গৰ স্বাস্থ্যৰ বুজ লবলৈ নেমকেয়াৰ হাস্পতালত উপস্থিত হয় কংগ্ৰেছ আৰু আছুৰ নেতৃবৰ্গ ৷ হাস্পতাল কৰ্তৃপক্ষই জুবিনক লগ কৰাৰ ক্ষেত্ৰত নিষেধাজ্ঞা জাৰি কৰাৰ পাচতো জনপ্ৰিয় শিল্পী গৰাকীৰ স্বাস্থ্যৰ বুজ লবলৈ চিকিৎসালয়ত উপস্থিত হয় কংগ্ৰেছ নেতা ৰিপুন বৰা, আছু সাধাৰণ সম্পাদক লুৰিণ জ্যোতি গগৈ আৰু আছু সভাপতি দীপাংক নাথ ৷

গুৱাহাটী, 1 মাৰ্চঃ জুবিন গাৰ্গৰ স্বাস্থ্যৰ খবৰ লবলৈ নেমকেয়াৰ হাস্পতালত উপস্থিত এজনৰ পিছত আনজন ৰাজনৈতিক নেতা দল সংগঠনৰ লগতে অনুৰাগী । শিল্পী গৰাকীৰ খবৰ লবলৈ দেওবাৰৰ দিনটোত চিকিৎসালয়ত উপস্থিত হয় কংগ্ৰেছ নেতা ৰিপুন বৰা আৰু আছুৰ নেতৃবৰ্গ । হাস্পতাল কৰ্তৃপক্ষই জুবিনক লগ কৰাৰ ক্ষেত্ৰত নিষেধাজ্ঞা জাৰি কৰিছে যদিও এজনৰ পিছত আনজন লোকে শিল্পী গৰাকীৰ স্বাস্থ্যৰ বুজ লবলৈ উপস্থিত হয় চিকিৎসালয়ত ৷

চিকিৎসালয়ত উপস্থিত হৈ ৰিপুন বৰাই কয়, "ইতিমধ্যেই সুস্থ হৈ উঠিছে জুবিন গাৰ্গ । ব্যস্ততাৰ বাবে খবৰ লবলৈ আহিব পৰা নাছিলো ৷ কিন্তু দলীয় কৰ্মীবৃন্দই খবৰ লবলৈ অহা বাবেই সকলো খবৰ পাই আছিলো ।" লগতে গৰিমা গাৰ্গ সৈতে ফোনেৰে বাৰ্তালাপ কৰাৰ কথাও জনালে ৰিপুন বৰাই ।

ৰিপুন বৰাৰ উপৰিও জুবিনৰ স্বাস্থ্যৰ বুজ লোৱাৰ উদ্দেশ্য চিকিৎসালয়ত উপস্থিত হয় সদৌ অসম ছাত্ৰ সন্থাৰ সাধাৰণ সম্পাদক লুৰিণ জ্যোতি আৰু সভাপতি দীপাংক নাথ ৷ আছুৰ সাধাৰণ সম্পাদক গৰাকীয়ে কয়, সুস্থ হৈ উঠিছে শিল্পী গৰাকী । জুবিনক সাক্ষাৎ কৰাৰ ক্ষেত্ৰত হাস্পতাল কৰ্তৃপক্ষই দিছে কঠোৰ নিৰ্দেশনা । যাৰ বাবে জুবিন গাৰ্গক লগ কৰাৰ ক্ষেত্ৰত অনুৰাগী অথবা সকলো লোকৰ বাবে দিয়া হৈছে নিষেধাজ্ঞা ।

আৰু পঢ়কঃ ইনাৰ লাইন পাৰ্মিটে উন্নয়নত বাধা দিব অসমকঃ হিমন্ত বিশ্ব শৰ্মা