গুৱাহাটী, 8 নৱেম্বৰ : সমাগত পোহৰৰ উৎসৱ দীপাৱলী । পোহৰৰ উৎসৱ দীপাৱলীলৈ মাজত মাথো কেইটামানদিন বাকী । দীপাৱলীৰ সমান্তৰালকৈ প্ৰস্তুতি চলিছে কালীপূজাৰো । ৰাজ্যৰ ভিন্ন প্ৰান্তত মৃণ্ময় শিল্পীসকল ব্যস্ত হৈ পৰিছে চাকি, প্ৰতিমা নিৰ্মাণত । বজাৰ ভৰি পৰিছে ভিন্নৰঙী লাইট, চাকিৰে ।
দীপাৱলীৰ প্ৰাকক্ষণত কামৰূপ জিলা উপাযুক্তৰ তৰফৰ পৰা জাৰি কৰা হৈছে কিছু নিৰ্দেশনাৱলী । পোহৰৰ উৎসৱ দীপাৱলীত যাতে কোনোধৰণৰ দুৰ্ঘটনা সংঘটিত নহয় আৰু শান্তিপূৰ্ণভাৱে উদযাপন কৰা হয়, সেই সন্দৰ্ভত আজি কামৰূপ মহানগৰ জিলা আয়ুক্ত কাৰ্যালয়ৰ সভাকক্ষত এখন বৈঠক অনুষ্ঠিত হয় ৷
জিলা আয়ুক্তৰ দায়িত্বত থকা অতিৰিক্ত জিলা আয়ুক্ত ড৹ ধ্ৰুৱজ্যোতি হাজৰিকাৰ অধ্যক্ষতাত অনুষ্ঠিত বৈঠকখনত কেবাগৰাকী জ্যেষ্ঠ আৰক্ষী বিষয়া, জিলা প্ৰশাসনৰ জ্যেষ্ঠ বিষয়া, চক্ৰ বিষয়াসকল, পৌৰ নিগমকে ধৰি বিভিন্ন বিভাগৰ বিষয়া আৰু কালী পূজা উদযাপন সমিতিৰ বিষয়ববীয়াসকল উপস্থিত থাকে৷ বৈঠকত অতিৰিক্ত আয়ুক্ত ধ্ৰুৱজ্যোতি হাজৰিকাই দীপাৱলীত ফটকা ফুটুৱাৰ ক্ষেত্ৰত উচ্চতম ন্যায়ালয়, ৰাষ্ট্ৰীয় সেউজ ন্যায়াধীকৰণ, ভাৰত চৰকাৰৰ পৰিবেশ আৰু বন মন্ত্ৰণালয় আৰু অসম প্ৰদূষণ নিয়ন্ত্ৰণ পৰিষদে দিয়া নিৰ্দেশৰ আধাৰত আৰক্ষী আয়ুক্তই কামৰূপ মহানগৰ জিলাৰ বাবে প্ৰস্তুত কৰা নীতি নিৰ্দেশনাসমূহৰ বিষয়ে উল্লেখ কৰে ৷
দীপাৱলীত কেৱল ভাৰতত নিৰ্মিত সেউজ ফটকাহে বিক্ৰী কৰিব আৰু ফুটাব পাৰিব৷ আনহাতে দীপাৱলীৰ নিশা কেৱল দুঘন্টাৰ বাবেহে ফটকা ফুটাব পাৰিব । নিশা ৮ বজাৰ পৰা ১০ বজাৰ ভিতৰত ৰাইজে সেউজ ফটকা ফুটাব পাৰিব৷ নিশা ১০ বজাৰ পৰা পাচদিনা পুৱা ৮ বজালৈ শব্দ সৃষ্টিকাৰী ফটকা ফুটুৱা সম্পূৰ্ণৰূপে নিষিদ্ধ থাকিব৷