গুৱাহাটী, ২৩ অক্টোবৰ: সংকটৰ মাজতো ৰাইজলৈ এক আশাৰ বতৰা কঢ়িয়াই আনিছে ভাৰত চৰকাৰৰ অৰ্থনৈতিক পৰিক্ৰমা বিভাগ আৰু বিত্তীয় মন্ত্ৰালয়ে । 'ঋণ প্ৰসাৰ কাৰ্যসূচী'ৰ জৰিয়তে ঋণী গ্ৰাহকক সহায় কৰাৰ এক পৰিকল্পনা যুগুত কৰিছে চৰকাৰে । শুকুৰবাৰে এই সন্দৰ্ভত কামৰূপ মহানগৰ জিলাৰ উপায়ুক্তৰ কাৰ্যালয়ৰ সভাকক্ষত এখন বৈঠক অনুষ্ঠিত হয় । সমাজৰ অৰ্থনৈতিক দিশটো টনকিয়াল কৰাৰ ক্ষেত্ৰত বেংকে ঋণ প্ৰদানৰ জৰিয়তে এক উল্লেখযোগ্য ভূমিকা পালন কৰে ।
কেৱল ব্যৱসায় সম্প্ৰসাৰণৰ ক্ষেত্ৰতে নহয়, কৰ্মসংস্থাপন সৃষ্টিৰ জৰিয়তে ব্যৱসায়িক প্ৰতিষ্ঠানৰ বিকাশতো বেংকৰ এই পদক্ষেপ এক উল্লেখযোগ্য আহিলাৰূপে বিবেচিত হৈ আহিছে । বিগত বৰ্ষৰ পৰাই ক'ভিড-১৯ মহামাৰীৰ বাবে দেশৰ প্ৰায়বোৰ ব্যৱসায়িক প্ৰতিষ্ঠান কম-বেছি পৰিমাণে ক্ষতিগ্ৰস্ত হৈছে । এনে সংকট কালত আত্মনিৰ্ভৰ পেকেজৰ অন্তৰ্গত বিভিন্ন ঋণ আঁচনিৰ যোগেদি এক বৃহৎ সংখ্যক ঋণী গ্ৰাহকক বেংক ব্যৱস্থাই সামৰি লৈছে । বেংকে অধিক সংখ্যক হিতাধিকাৰীক এই আঁচনিসমূহৰ জৰিয়তে উপকৃত কৰাৰ উদ্দেশ্যে ঋণ প্ৰদানৰ বাবে আগবাঢ়ি আহিছে ।
এই উদ্দেশ্য আগত ৰাখি ভাৰত চৰকাৰৰ অৰ্থনৈতিক পৰিক্ৰমা বিভাগ আৰু বিত্তীয় মন্ত্ৰালয়ে এই উৎসৱৰ বতৰতে বেংকসমূহক "ঋণ প্ৰসাৰ কাৰ্যসূচী"ৰ নিৰ্দেশ দিছে । উক্ত নিৰ্দেশনা কাৰ্যকৰী কৰাৰ বাবে নীতি নিৰ্ধাৰণ কৰিবলৈ শুকুৰবাৰে কামৰূপ মহানগৰ জিলাৰ উপায়ুক্ত বিশ্বজিত পেগুৰ অধ্যক্ষতাত এখন গুৰুত্বপূৰ্ণ বৈঠক অনুষ্ঠিত হয় ।