আই আই টি গুৱাহাটীত জাপানৰ শিক্ষাৰ্থীৰ আত্মহত্যা

দেশৰ আগশাৰীৰ উচ্চ শিক্ষা প্ৰতিষ্ঠান আই আই টি গুৱাহাটীত পুনৰ সংঘটিত আত্মহত্যাৰ ঘটনা ৷ আই আই টি গুৱাহাটীত চিপ লৈ আত্মহত্যা জাপানৰ শিক্ষাৰ্থীৰ ।

গুৱাহাটী,22 নৱেম্বৰ:দেশৰ অন্যতম আগশাৰীৰ উচ্চ শিক্ষাৰ প্ৰতিষ্ঠান ভাৰতীয় প্ৰযুক্তি বিদ্যা প্ৰতিষ্ঠান চমুকৈ আই আই টি গুৱাহাটীৰ লোহিত হোষ্টেলত জাপানৰ এগৰাকী ছাত্ৰই আত্মহত্যা কৰা ঘটনাই ব্যাপক চাঞ্চল্যৰ সৃষ্টি কৰিছে ৷ ঘটনা অনুসৰি যোৱা কালি দিনৰ প্ৰায় তিনি বজাত হোষ্টেলটোৰ E-143 নম্বৰ কোঠাৰ বাথৰূমত চিপ লোৱা অৱস্থাত সহপাঠীয়ে উদ্ধাৰ কৰে ক'তা অন'ডা নামৰ শিক্ষাৰ্থীজনৰ মৃতদেহ ।

উক্ত ঘটনাৰ পিছতেই সমগ্ৰ আই আই টি গুৱাহাটীত তীব্ৰ চাঞ্চল্যৰ সৃষ্টি হৈছে । শিক্ষাৰ্থীজন সূদুৰ জাপানৰ জিফু বিশ্ববিদ্যালয়ৰ পৰা আই আই টি গুৱাহাটীত তিনিমহীয়া ইন্টাৰ্ণশ্বিপ অধ্যয়নৰ বাবে আহিছিল । স্মৰ্তব্য আত্মহত্যা কৰা ক'তা অন'ডা আছিল আই আই গুৱাহাটীৰ বায়' ছায়েন্স আৰু বায়' ইঞ্জিনিয়াৰিং বিভাগৰ শিক্ষাৰ্থী । শনিবাৰে আই আই টি গুৱাহাটী বায়'চাইন্স আৰু বায়'ইঞ্জিনিয়াৰিং বিভাগত সম্পন্ন হৈছিল বিদায় সম্বৰ্দ্ধনা আৰু প্ৰীতি ভোজৰ । ৩০ নৱেম্বৰত জাপানলৈ উভতি যোৱাৰ যাৱতীয়া সুবিধা তথা উৰা জাহাজৰ টিকটও বুক কৰিছিল শিক্ষাৰ্থী গৰাকীয়ে ৷ উল্লেখ্য যে, আই আই টি গুৱাহাটীৰ ২৫ বছৰীয়া ইতিহাসত শিক্ষাৰ্থীৰ এনেধৰণৰ আত্মহত্যাৰ ঘটনা বহু সংঘটিত হৈছে ।

তাৰ মাজতে এজন বিদেশী ছাত্ৰৰ আত্মহত্যাৰ ঘটনাই কেৱল শিক্ষাৰ্থী সকলকে নহয় উচ্চ শিক্ষা প্ৰতিষ্ঠানখনৰ প্ৰতিজনকে জোঁকাৰি গৈছে । আই আই টি গুৱাহাটীত মানসিকভাৱে ভাগি পৰা শিক্ষাৰ্থীৰ বাবে কাউন্সিলিংৰ ব্যৱস্থা থকাৰ পিছতো আই আই টিত কিয় বাৰে-বাৰে এনেধৰণৰ আত্মহত্যাৰ ঘটনা সংঘটিত হয় এই লৈ সৰ্বত্ৰে এতিয়া সৰৱ চৰ্চা আৰম্ভ হৈছে । এই ঘটনাৰ খবৰ বিয়পি পৰাৰ লগে লগে আমিনগাঁও আৰক্ষী, সহ জিলা দণ্ডাধীশ প্ৰনৱ দত্ত গোস্বামী ঘটনাস্থলীত উপস্থিত হৈ তদন্ত আৰম্ভ কৰিছে । ইফালে মৃতদেহটো মৰণোত্তৰ পৰীক্ষাৰ বাবে জি এম চি এইচলৈ প্ৰেৰণ কৰিছে আৰক্ষীয়ে ।

আৰু পঢ়কওদালগুৰিত পুনৰ পথ দুৰ্ঘটনা : দুদিনত 11জন লোক নিহত