গুৱাহাটী,১১ নৱেম্বৰ :চৰকাৰী ভুলৰ বাবে ২০১৭ চনৰ ২৮ নৱেম্বৰত বন বিভাগৰ উচ্ছেদত গৃহহীন হ'বলগীয়া হৈছিল গুৱাহাটীৰ জনশিমলুৰ বাসিন্দাসকল । চৰকাৰৰ এই অমানৱীয় উচ্ছেদ অভিযানৰ ফলত অঞ্চলটোৰ বিজুলী সংযোগ বিছিন্ন হোৱাৰ উপৰিও বিদ্যুৎ পৰিবাহী খুটা আৰু ট্ৰেন্সফৰ্মাৰ ধ্বংস কৰি দিয়া হৈছিল । যাৰ ফলত বিদ্যুৎ যোগান অবিহনে প্ৰায় ৪ বছৰ ধৰি অন্ধকাৰৰ মাজত জীৱন-নিৰ্বাহ কৰিবলৈ বাধ্য হৈছিল জনশিমলুবাসী । ইফালে প্ৰাপ্য অধিকাৰ আৰু ন্যায় প্ৰদানৰ বাবে চৰকাৰৰ বিৰুদ্ধে ধাৰাবাহিক প্ৰতিবাদী কাৰ্যসূচী অব্যাহত ৰাখে অঞ্চলবাসীয়ে ।
পৰৱৰ্তী সময়ত গুৱাহাটী উচ্চ ন্যায়ালয়ে ২০২০ চনৰ নৱেম্বৰ মাহত অঞ্চলটোত পুনৰ বিদ্যুৎ সংযোগৰ বাবে ৰায় প্ৰদান কৰে । সেই অনুসৰি বুধবাৰে দিছপুৰ সমষ্টিৰ স্থানীয় বিধায়ক অতুল বৰা আৰু আমচিং গাঁও পঞ্চায়তৰ সভানেত্ৰী কল্পনা বৰাৰ উপস্থিতিত জনশিমলু ননকে ৰাজহ গাঁৱৰ বিদ্যুৎ সংযোগৰ শুভাৰম্ভ কৰে । প্ৰায় ২০০ কিলো ৱাটৰ নতুন ট্ৰেনফৰ্মাৰৰ জৰিয়তে অঞ্চলবাসীৰ বিদ্যুৎ যোগানৰ দীৰ্ঘদিনীয়া সমস্যা দূৰ হ'ব বুলি আশা প্ৰকাশ কৰে ।