গুৱাহাটী, 17 জানুৱাৰী: বুধবাৰে গুৱাহাটীত উপস্থিত হয় ISRO ৰ অধ্যক্ষ ড৹ শ্ৰীধৰ পানিকাৰ সোমনাথ । প্ৰাগজ্যোতিষপুৰ বিশ্ববিদ্যালয়ৰ উদ্যোগত শ্ৰীমন্ত শংকৰদেৱ আন্তৰ্জাতিক প্ৰেক্ষাগৃহত অনুষ্ঠিত কৰা সম্বৰ্ধনা তথা মত-বিনিময় অনুষ্ঠানত অংশ লয় বিজ্ঞানীগৰাকীয়ে । শেহতীয়াকৈ চন্দ্ৰৰ দক্ষিণ গোলাৰ্ধত চন্দ্ৰযান-৩ ৰ সফল অৱতৰণ কৰোৱা বিজ্ঞানীদলৰ প্ৰমুখ বিজ্ঞানী তথা ভাৰতীয় মহাকাশ গৱেষণা সংস্থাৰ অধ্যক্ষ ড৹ শ্ৰীধৰ পানিকাৰ সোমনাথ ৷
প্ৰাগজ্যোতিষপুৰ বিশ্ববিদ্যালয়ে চন্দ্ৰযান-৩ ৰ সফলতাৰ বিজয় উৎসৱ তথা শেহতীয়াকৈ ISRO ৰ দ্বাৰা আদিত্য L-১ ৰ সূৰ্যমুখী অভিযান উপলক্ষে অনুষ্ঠিত কৰে এই বিশেষ অনুষ্ঠান । উক্ত অনুষ্ঠানত "চন্দ্ৰযান-৩" ৰ সফলতা শীৰ্ষক এখন তথ্যচিত্ৰও প্ৰদৰ্শন কৰা হয় ।
অনুষ্ঠানত অংশগ্ৰহণ কৰে কেইবাখনো বিদ্যালয়, মহাবিদ্যালয়ৰ শিক্ষকৰ লগতে শিক্ষাৰ্থীসকলে । এই অনুষ্ঠানত অংশগ্ৰহণ কৰা ছাত্র-ছাত্ৰীসকলৰ সৈতে প্ৰত্যক্ষ মত-বিনিময় কৰে ভাৰতীয় মহাকাশ গৱেষণা সংস্থাৰ অধ্যক্ষ শ্ৰীধৰ পানিকাৰ সোমনাথে ।