গুৱাহাটী, ২০ জুলাই: গুৱাহাটী পৌৰ নিগমত(জি এম চি) ঘৰে ঘৰে জাৱৰ সংগ্ৰহৰ বাবে এন জি অ'ক নিবিদা দিয়াৰ নামত সংঘটিত হৈছে অনিয়ম(Irregularities of NGO bid in Guwahati Municipal Corporation)।এনে অনিয়ম সংঘটিত কৰাৰ অভিযোগত গুৱাহাটী পৌৰ নিগমৰ (জি এম চি) এন জি অ' নিৰ্বাচন প্ৰক্ৰিয়াৰ বিষয়া তথা অভিযন্তা সীমান্ত জ্যোতি বৰুৱাৰ বিৰুদ্ধে তদন্তৰ নিৰ্দেশ দিছে জি এম চিয়ে (GMC orders inquiry against engineer)। লগতে তেওঁক উক্ত পদৰ পৰা অব্যাহতি দিয়া হৈছে বুলি গুৱাহাটী পৌৰ নিগম কতৃপক্ষই সদৰি কৰিছে । বিষয়াগৰাকীৰ বিৰুদ্ধে ধনৰ বিনিময়ত একাংশ এন জি অ'ক নিবিদা দিয়াৰ অভিযোগ উত্থাপিত হৈছে ।
গুৱাহাটী পৌৰ নিগমৰ মেয়ৰ মৃগেন শৰণীয়াই উল্লেখ কৰা মতে, গুৱাহাটী পৌৰ নিগমৰ মঙলবাৰে হৈ যোৱা সাধাৰণ সভাত বিষয়া সীমান্ত জ্যোতি বৰুৱাৰ বিৰুদ্ধে তদন্তৰ নিৰ্দেশ দিয়া হৈছে । পৰৱৰ্তী সময়ত তেওঁৰ বিৰুদ্ধে বিহিত ব্যৱস্থা লোৱা হ'ব বুলি তেওঁ কয় । ঘৰে ঘৰে জাৱৰ সংগ্ৰহৰ বাবে থকা এন জি অ'ৰ কাৰ্যকাল উকলি যোৱাৰ পূৰ্বে মাৰ্চত নতুন নিবিদা লোৱা হৈছিল । সেই সময়ত তেওঁ বহু এন জি অ'ক খবৰ দিয়া নাছিল। একাংশ এন জি অ'ক ধনৰ লেন দেন কৰি নিবিদা দিয়াৰ অভিযোগ উত্থাপিত হৈছে তেওঁৰ বিৰুদ্ধে । অতি শীঘ্ৰে জি এম চিয়ে এন জি অ' সমূহক জাৱৰ সংগ্ৰহৰ নিবিদা দিব বুলি মন্তব্য কৰে তেওঁ ।