গুৱাহাটী,৭ জুন:হিমালয় আৰু ভাৰতৰ সমভুমিৰ মাজৰ এক বিশাল অঞ্চল সামৰি থকা ভুটানলৈ ৰে'ল যোগাযোগ ব্যৱস্থা গঢ় দিয়াৰ বাবে তৎপৰ হৈ উঠিছে ভাৰত চৰকাৰৰ বৈদেশিক মন্ত্ৰালয় । বিগত দীৰ্ঘকাল ধৰি কেৱল চৰ্চাৰ মাজত থকা ভাৰত-ভুটান ৰে'লপথৰ পৰিকল্পনা এইবাৰ বাস্তৱায়িত হোৱাৰ পথত((Indian Railways takes steps to construct rail route to Bhutan)) ।
উল্লেখ্য যে ২০০৫ চনতে ৰে'ল সংযোগ প্ৰকল্পৰ ৰূপায়নৰ বাবে ভাৰত আৰু ভুটান চৰকাৰৰ মাজত এক বুজাবুজিৰ চুক্তি স্বাক্ষৰিত হৈছিল । এই চুক্তি অনুসৰি ভাৰতীয় ৰে'ল বিভাগে ভুটান-গেলেংফু (৫৭.৭ কিঃমিঃ), ৰঙিয়া-ছামদ্ৰুপ জংখাৰ (৪৮ কিঃমিঃ), বনৰহাট-ছামষ্টে (২৩.১৫ কিঃমিঃ) হাছিমাৰা-ফুলছিলিং (১৭.৫২ কিঃমিঃ) আৰু পাঠশালা -নাংগলাম (৫১.১৫ কিঃমিঃ) ৰে'ল সংযোগৰ বাবে অধ্যয়ন চলাইছিল ।
কিন্তু সেই অধ্যয়নে অসমৰ পৰা ভুটান সংযোগী তিনি ৰে'লপথ আৰু পশ্চিম বংগৰ দুই ঠাইৰ পৰা ভুটান সংযোগী দুই প্ৰস্তাৱিত ৰে'ল পথ বাস্তৱায়িত নহ'ল । আজিৰে পৰা সোতৰ বছৰৰ আগতে লোৱা সেই পদক্ষেপে কিয় বাস্তৱ ৰূপ নললে সেয়া আজিও এক ডাঙৰ প্ৰশ্ন । এতিয়া এনে জঠৰতা ভাঙি কেন্দ্ৰীয় চৰকাৰে কৌশলগত কাৰণতে ৰে'ল সংযোগেৰে চুবুৰীয়া দেশ ভুটানক সামৰি ল'ব বিচাৰিছে ভাৰত চৰকাৰে ।
ৰে'ল বিভাগৰ এক শীৰ্ষ সূত্ৰই ই টিভি ভাৰতক জনোৱা মতে, এই ৰে'লপথ নিৰ্মাণৰ বাবে কেন্দ্ৰীয় চৰকাৰৰ বৈদেশিক মন্ত্ৰালয়ে(Foreign Ministry of Central Government) ৰে'ল বিভাগৰ ওপৰত হেঁচা প্ৰদান কৰিছে । এই কথা উল্লেখ কৰি ৰে'ল পৰিষদে উত্তৰ-পূৱ সীমান্ত ৰেলৱেৰ মহাপ্ৰবন্ধকলৈ চিঠি প্ৰেৰণ কৰিছে বুলি সূত্ৰটোৱে জানিবলৈ দিছে ।
সূত্ৰটোৰ মতে,তৎপৰতাৰ অংশ হিচাপে অতি শীঘ্ৰে কোকৰাঝাৰৰ পৰা ভুটানৰ গেলেংফু সংযোগী পথাংশত কিদৰে ৰে'ল লাইন বহুৱাব পৰা যায় তথা সামাজিক পৰিস্থিতিৰ অধ্যয়নৰ বাবে বিভাগে পুজিৰ অনুমোদন দিছে । এই অধ্যয়ন অহা জুলাই মাহৰ পৰা আৰম্ভ হৈ তিনিমাহৰ ভিতৰতে ৰে'ল বিভাগে প্ৰতিবেদন প্ৰস্তুত কৰিব লাগিব ।
কেন্দ্ৰীয় চৰকাৰে ভাবে যে এক ৰে'ল সংযোগ প্ৰকল্পই ভাৰত আৰু ভুটানৰ মাজৰ সম্পৰ্ক অধিক শক্তিশালী কৰি তুলিব । দ্বিপাক্ষিক সম্পৰ্কই আন আন কেতবোৰ সুৰক্ষা সম্পৰ্কীয় বিষয়টো বিশেষ মাত্ৰা প্ৰদান কৰিব । অৱশ্যে, ডিমা হাছাওত সৃষ্টি হোৱা প্ৰাকৃতিক দুৰ্যোগৰ পাছত কোকৰাঝাৰ-গেলেংফু ব্ৰডগ'জ ৰেল লাইন নিৰ্মাণৰ সিদ্ধান্ত যে যথেষ্ট গুৰুত্বপুৰ্ণ হ'ব সেই কথাও বিশেষ ভাবে চৰ্চিত হৈছে ।
লগতে পঢ়ক:৫৮৯ নম্বৰেৰে নৱম স্থান দখল কৰিলে ডিব্ৰুগড়ৰ ছল্টব্ৰুক স্কুলৰ ছাত্ৰ ধৃতীস্মান দত্তই
