গুৱাহাটী, 30 জুলাই : নেৰানেপেৰা বৰষুণৰ ফলত সংহাৰী ৰূপ ধাৰণ কৰা ৰাজ্যৰ বান পৰিস্থিতি কিছু উন্নত হৈছে যদিও ৰাজ্যৰ 33 খন জিলাৰ ভিতৰত 21 খন জিলা বৰ্তমানো বানৰ কবলত আছে ৷ ৰাষ্ট্ৰীয় দুৰ্যোগ ব্যৱস্থাপনা বিভাগে সদৰি কৰা মতে, ৰাজ্যৰ 21 খন জিলাৰ 54 টা ৰাজহ চক্ৰৰ 1,536 খন গাঁও বানাক্ৰান্ত হোৱাৰ লগতে 16,54,984 গৰাকী লোক বানত প্ৰভাৱিত হৈ আছে ৷ আনহাতে, বৰ্তমানলৈ বানত 107 গৰাকী লোক মৃত্যুমুখত পৰিছে ৷
বানাক্ৰান্ত ৰাইজৰ বাবে চৰকাৰে স্থাপন কৰা 321 টা আশ্ৰয় শিবিৰত 37,012 গৰাকী লোকে আশ্ৰয় লৈ আছে ৷ বানৰ ফলত ৰাজ্যৰ কৃষকসকলৰ ব্যাপক ক্ষতি হোৱা পৰিলক্ষিত হৈছে ৷ সম্প্ৰতি বান পৰিস্থিতি কিছু উন্নত হৈছে যদিও ৰাজ্যৰ 92,899.95 হেক্টৰ কৃষিভূমি এতিয়াও পানীৰ তলত আছে ৷