গুৱাহাটী, ২ ফেব্ৰুৱাৰী : ৰাজ্যৰ ৪০ লাখ ডি ভোটাৰক লৈ চিন্তিত বৌদ্ধিক মহল । শুকুৰবাৰে ৰাজ্যৰ ৪০ লাখ ডি ভোটাৰৰ ভৱিষ্যত সুনিশ্চিত কৰিবলৈ মহানগৰীৰৰ ডনবস্ক স্কুলত শুনানি গ্ৰহণ কৰা হয় । গুৱাহাটী উচ্চ ন্যায়ালয়ৰ প্ৰাক্তন ন্যায়ধীশ গোপালা গৌড়াৰ অধ্যক্ষতাত আয়োজিত শুনানি প্ৰক্ৰিয়াত প্ৰত্যকগৰাকী ডি ভোটাৰৰ সমস্যাৰ বুজ লোৱা হয় ।
উক্ত অনুষ্ঠানটোতে উপস্থিত থাকি ৰাজ্যখনৰ বিশিষ্ট বুদ্ধিজীৱি ড০ হিৰেণ গোহাঁই মন্তব্য কৰে যে, ৰাজ্যখনৰ সাম্প্ৰতিক পৰিস্থিতিৰ বাবে পোন পোটীয়াকৈ কেন্দ্ৰীয় চৰকাৰ জগৰীয়া । সকলো ডি ভোটাৰক মানৱীয়তাৰ দৃষ্টি ভংগীৰে চোৱা উচিত । তেওঁ কয় যে, হোটেল ৰিৰ্জট খুলিলেই উন্নয়ন নহয় । ঔপনিৱেশিক কালৰ পৰা কোনো এখন চৰকাৰে অসম বা উত্তৰ-পূৰ্বাঞ্চলৰ প্ৰতি ন্যায় কৰা নাই । ইয়াৰে জনসাধাৰণৰ অভাৱ অভিযোগ, আৱেগ অনুভূতিৰ প্ৰতি কোনো কৰ্ণপাত কৰা নাই । ৰাজ্যৰ প্ৰভাৱশালী মন্ত্ৰী হিমন্ত বিশ্ব শৰ্মা মন্তব্যৰ প্ৰতিক্ৰিয়া প্ৰকাশ কৰি বুদ্ধিজীৱিগৰাকীয়ে কয় যে, যেতিয়াই ৰাইজে চৰকাৰৰ অন্যায় বিৰুদ্ধে মাত মাতে, তেতিয়াই তাত তেওঁলোকে তৃতীয় শক্তি জড়িত থকাৰ উমান পায় ।
