গুৱাহাটী, 8 মে' : বৃহস্পতিবাৰে নিশা ৰাজ্যখনত নতুনকৈ আঠগৰাকী ৰোগী Covid-19 আক্ৰান্ত বুলি চিনাক্ত হোৱাৰ পাচত গুৱাহাটী মহানগৰীকে ধৰি সমগ্ৰ ৰাজ্যত বিৰাজ কৰিছে তীব্ৰ আতংকৰ । এনে সময়ত আতংকিত নহৈ অধিক সতৰ্কতা অৱলম্বন কৰিবলৈ ৰাজ্যবাসীক আহ্বান জনায় ৰাজ্যৰ স্বাস্থ্যমন্ত্ৰী ডঃ হিমন্ত বিশ্ব শৰ্মাই । মন্ত্ৰী গৰাকীয়ে নতুনকৈ চিনাক্ত হোৱা Covid-19 আক্ৰান্ত ৰোগীকেইগৰাকীৰ সবিশেষ বৰ্ণনা কৰাৰ লগতে আটাইকে চিকিৎসা প্ৰদান কৰি থকাৰ কথা উল্লেখ কৰে । নতুনকৈ চিনাক্ত হোৱা ৰোগী কেইগৰাকীৰ সংস্পৰ্শলৈ অহা আটাইকে চিনাক্ত কৰি ইতিমধ্যে সৰুসজাইস্থিত কোৱাৰেণ্টাইন কক্ষলৈ প্ৰেৰণ কৰাৰ লগতে মহানগৰীৰ চাৰিটাকৈ অঞ্চলক প্ৰশাসনে কণ্টেইনমেণ্ট জ'ন হিচাবে ঘোষণা কৰাৰ কথা উল্লেখ কৰে ।
ইফালে আজমীৰ শ্বৰীফ ভ্ৰমণ কৰি ২ মে'ত ঘৰমুৱা হোৱা ৪৫ জনীয়া দলটো কাছাৰ জিলাত উপস্থিত হৈছিল ৬ মে'ত । এইসকলৰ মাজত চাৰিজনৰ দেহত Covid-19 চিনাক্ত হোৱাৰ পাচত তেওঁলোককো বৰ্তমান শিলচৰ চিকিৎসা মহাবিদ্যালয়ত চিকিৎসা প্ৰদান কৰি থকাৰ লগতে আনসকল যাত্ৰীক কোৱাৰেণ্টাইনত ৰখাৰ কথা সংবাদমেলখনত অৱগত কৰে ৰাজ্যৰ স্বাস্থ্যমন্ত্ৰী গৰাকীয়ে ।