গুৱাহাটী, ২০ ছেপ্টেম্বৰ: আগন্তুক ২০২৪-২৫ নাট্যবৰ্ষৰ বাবে সাজু হৈছে ভ্ৰাম্যমাণৰ এক উল্লেখনীয় থিয়েটাৰ গোষ্ঠী হেঙুল থিয়েটাৰ । তিনিখন নাটকেৰে ৩৭ সংখ্যক নাট্যবৰ্ষৰ বাবে সাজু হৈছে হেঙুল গোষ্ঠী। ইতিমধ্যে সামাজিক মাধ্যম যোগে প্ৰকাশ পাইছে হেঙুল থিয়েটাৰৰ আগন্তুক নাট্যবৰ্ষৰ দুখনকৈ পোষ্টাৰ । আগন্তুক নাট্যবৰ্ষত হেঙুল থিয়েটাৰৰ মঞ্চত দেখিবলৈ পোৱা যাব কমল লোচন, স্নিগ্ধা গগৈ, নিৰূপম শইকীয়া, মহেশ বৰা, শিল্পীশিখা বৰা, অশ্ৰুমণি বৰা, হেলেন আৰু হিমাংশু গগৈক ।
সামাজিক মাধ্যমযোগে হেঙুলগোষ্ঠীয়ে এটা পোষ্ট শ্বেয়াৰ কৰি লিখিছে, ‘‘সু⁻পৰিকল্পিত চিন্তা আৰু ফলপ্ৰসু প্ৰচেষ্টাৰে নটৰাজ থিয়েটাৰৰ পথিকৃৎ আদর্শক সাৰোগত কৰি অসমৰ ভ্ৰাম্যমাণ থিয়েটাৰ এতিয়া এক বিশাল উদ্যোগ, অনন্য অনুষ্ঠান । এই বিশালতাত সংযোজিত অজস্ৰ খ্যাত⁻অখ্যাত নাট্যগোষ্ঠী । তাৰে এটি চিনাকি নাম প্ৰয়াত প্ৰশান্ত হাজৰিকা আৰু ইলা কাকতিৰ যত্নপালিত হেঙুল থিয়েটাৰৰ যুগজয়ী যাত্ৰা অনিৰুদ্ধ । অজস্ৰ দৰ্শক⁻শ্ৰোতাৰ হৃদয়ত হায়তাল ৰঙেৰে ৰঙা হেঙুল থিয়েটাৰৰ নাট্যমঞ্চত নতুন চিন্তা, নতুন নাট্যকৰ্ম নতুন অভিনয় শিল্পী, কলা⁻কুশলীৰ নতুনৰ ষোড়শোপচাৰেৰে অব্যাহত চিৰ নতুনৰ আৰাধনা । সেই বাটেৰেই বাট বুলি অহা ২০২৪⁻২৫ নাট্যবৰ্ষৰ বাবে এদল নতুন অভিনেতা⁻অভিনেত্ৰীৰ সংযোজনেৰে আমি চলাইছোঁ নিৰন্তৰ প্ৰস্তুতি । এজাক তাৰুণ্যৰ প্ৰতিভাৰ দীপ্তিৰে উজ্জ্বল সমাৱেশেৰে অহা নাট্যবৰ্ষত হেঙুলৰ মঞ্চক ব্যতিক্ৰমীক আকৰ্ষণৰ কেন্দ্ৰবিন্দু কৰি তুলিব ।’’
ইফালে ২০২৪-২৫ নাট্যবৰ্ষত থাকিব প্ৰণৱ ভৰালীৰ নাটক মছজিদ ৰোড নামঘৰ পথ । এই সন্দৰ্ভত হেঙুল গোষ্ঠীয়ে লগতে লিখিছে, ‘‘আৰু এজন তৰুণক লৈ আকৌ কিবা এটা কৰাৰ কথা ভাবিছোঁ । ভ্ৰাম্যমাণ থিয়েটাৰ উদ্যোগটোত নাটক আৰু নাট্যকাৰক লৈ বহু চৰ্চা চলি থকাৰ সময়তে এজন নতুন নাট্যকাৰক জন্ম দিব বিচাৰিছোঁ । কৃষ্ণচূড়া ডট কম চালেনে ? সেই কৃষ্ণচূড়া ডট কমৰ স্ৰষ্টা অত্যন্ত প্ৰতিভাধৰ প্ৰণৱ ভৰালীক অহা নাট্যবৰ্ষত হেঙুল থিয়েটাৰৰ বাবে এখন নাটক লিখাৰ দায়িত্ব দিছোঁ । আজি সেইখন নাটকৰেই প্ৰথমখন পোষ্টাৰ আপোনালোকলৈ আগবঢ়ালোঁ । ভ্ৰাম্যমাণত প্ৰণৱ ভৰালী একেবাৰে ফুলকুমলীয়া । ইতিমধ্যে কেইবাখনো ধাৰাবাহিকৰ লগতে ৰবীন্দ্ৰ ভৱনত প্ৰদৰ্শিত "বাউলী মেঘৰ সাধুৰ" পৰা ৰাষ্ট্রীয় পৰ্যায়ত পুৰস্কাৰ বুটলিবলৈ সক্ষম হোৱা "পিম্পল"লৈকে, সকলোতে ৰাইজক নিজৰ দক্ষতাৰ উমান দিবলৈ সক্ষম হৈছে প্ৰণৱ ভৰালীয়ে । টিহুৰ মাজ ৰাস্তাত বাটৰ নাটৰ পৰা আজি হেঙুলৰ চোতাললৈ, আমি তেওঁক মাত্ৰ বাট দেখুৱাইছো, মৰম আৰু আশীৰ্বাদেৰে তেওঁৰ যাত্ৰা সোণসেৰীয়া কৰাৰ দায়িত্ব আপোনাসবৰ । সাজু হওক, ওপৰৰ সেই বাক্যকেইশাৰীৰ আঁৰৰ ৰহস্য জানিবলৈ অহা নাট্যবৰ্ষলৈ অপেক্ষা কৰক । হেঙুলৰ মঞ্চত এক অনুমেয় কাহিনীৰে আহি আছে...!’’