মূল্যবৃদ্ধিক লৈ বজাৰত খেপো মামাৰ হাহাকাৰ

ৰাজ্যজুৰি বৃদ্ধি পাইছে দৈনিক ব্যৱহাৰ্য সামগ্ৰীৰ মূল্য ৷ বজাৰ কৰিবলৈ গৈ বিমোৰত পৰিল ‘খেপো মামা’ খ্যাত জনপ্ৰিয় কৌতুক অভিনেতা তাজিৰ আহমেদ । ব্যংগাত্মক গীতেৰে ইটিভি ভাৰতৰ আগত সাধাৰণ ৰাইজৰ দুখ-দুৰ্দশাৰ কথা ব্যক্ত কৰে খেপো মামাই ৷

গুৱাহাটী,8 নৱেম্বৰ : গুৱাহাটীৰ বজাৰত এতিয়া নিত্য ব্যৱহাৰ্য সামগ্ৰীৰ জুই চাই দাম । দৰিদ্ৰ লোকৰ বাবে যেন বজাৰলৈ যোৱাতো এতিয়া এক প্ৰত্যাহ্বান হৈ পৰিছে । আলু-পিয়াজটো বাদেই, সাধাৰণ শাক-পাচলিৰ মূল্যও যথেষ্ট হাৰত বৃদ্ধি পাইছে । গুৱাহাটীৰ ভৰলুমুখৰ দেওবৰীয়া বজাৰতো বৃদ্ধি হৈছে সামগ্ৰীৰ মূল্য । একাংশ বিক্ৰেতাই নিজ ইচ্ছানুসৰি সামগ্ৰীৰ মূল্যবৃদ্ধি কৰাৰ অভিযোগ গ্ৰাহকসকলৰ ৷

চৰকাৰৰ নিৰ্দেশ অনুসৰি, পিয়াজৰ খুচুৰা মূল্য হৈছে 56-57 টকা । কিন্তু বজাৰত বিক্ৰী হৈছে 60-70 টকাত । বিক্ৰেতাৰ মতে 60 টকাৰ তলত পিয়াজ বিক্ৰী কৰিব নোৱাৰে এইসকল ব্যৱসায়ীয়ে ।

ইফালে বজাৰ কৰিবলৈ গৈ বিমোৰত পৰিল ‘খেপো মামা’ খ্যাত জনপ্ৰিয় কৌতুক অভিনেতা তাজিৰ আহমেদ । পূৰ্বে কেজি হিচাপ লোৱা সামগ্ৰী এতিয়া ল’বলগীয়া হৈছে পোৱা হিচাপত। মূল্যবৃদ্ধিয়ে যেন সকলো শ্ৰেণীৰ লোককে জুৰুলা কৰি পেলাইছে । উক্ত বজাৰতে খেপো মামাই ইটিভি ভাৰতৰ আগত ব্যংগাত্মক গীতেৰে ক’লে সাধাৰণ ৰাইজৰ দুখ-দুৰ্দশাৰ কথা ।

লগতে পঢ়ক :মন্ত্ৰী হিমন্তৰ দম থাকিলে বিটিচি ভংগ কৰি দিয়কঃ চন্দন ব্ৰহ্ম