এটা কুকুৰ আৰু মৃত্যু ভাবুকি

কিছুদিন পূৰ্বে  মহানগৰীৰ নিলোৎপল বৰুৱা নামৰ ব্যক্তি গৰাকীয়ে নিজৰ পোহনীয়া কুকুৰটোক অত্যাচাৰ কৰা ভিডিঅ' ছচিয়েল মিডিয়াত ভাইৰেল হৈ পৰা পাছতেই কুকুৰটোক উদ্ধাৰৰ বাবে যোৱা মহিলাক ব্যক্তি গৰাকীয়ে প্ৰাণে মৰাৰ ভাবুকি প্ৰদান কৰে ৷

গুৱাহাটী, 25 জুলাইঃ পোহনীয়া কুকুৰক অত্যাচাৰ কৰি পশুপ্ৰেমীৰ ৰোষত পৰিছে মহানগৰীৰ এজন লোক । ঘটনা অনুসৰি, কিছুদিন পূৰ্বে মহানগৰীৰ নিলোৎপল বৰুৱা নামৰ এগৰাকী ব্যক্তিয়ে নিজৰ পোহনীয়া কুকুৰটোক অত্যাচাৰ কৰা ভিডিঅ' ছ'চিয়েল মিডিয়াত ভাইৰেল হৈ পৰিছিল ৷ লগে লগে ব্যক্তিজনৰ এই কাৰ্যত জাঙুৰ খাই উঠে পশুপ্ৰেমীসকল আৰু উৰ্মিলা দাস নামৰ এগৰাকী মহিলাই লোকজনৰ পৰা কুকুৰটো উদ্ধাৰ কৰিবলৈ নিলোৎপল বৰুৱাৰ ঘৰত উপস্থিত হয় ৷ কিন্তু ব্যক্তিজনে ওলোটাই মহিলা গৰাকীক অকথ্য নিৰ্যাতন চলোৱাৰ লগতে প্ৰাণে মৰাৰ ভাবুকিও প্ৰদান কৰে ৷ ইতিমধ্যেই মহিলাগৰাকীয়ে যোৱা 18 জুলাই তাৰিখে দিছপুৰ আৰক্ষী থানাত এখন এজাহাৰ দাখিল কৰিছিল যদিও আৰক্ষীয়ে কোনোধৰণৰ ব্যৱস্থা গ্ৰহণ কৰা নাছিল ৷ সেয়ে বুধবাৰে অভিনৱ প্ৰয়াস আৰু ডা পাৰপাউছ ফাউণ্ডেশ্যন নামৰ সংগঠন দুটাই দিছপুৰ আৰক্ষী থানাত উপস্থিত হৈ শীৰ্ষ আৰক্ষী বিষয়াক সাক্ষাৎ কৰে আৰু ঘটনাৰ অতিশীঘ্ৰে ব্যৱস্থা গ্ৰহণ কৰিবলৈ দাবী জনায় ৷